ԵՐԵՎԱՆ, 14 հուլիսի — Sputnik. Փառատոնի հինգերորդ օրը սկսվեց բասկ ռեժիսոր Ասիեր Ալտունայի մամուլի ասուլիսով, լրագրողների հարցերը կուտակվել էին «Ամամա» ֆիլմի դիտումից հետո:
Նախօրեին հանդիսատեսը ցնցված էր բասկ ռեժիսորի ֆիլմից։
Բուռն քննարկումների ժամանակ անդրադարձ եղավ հայրերի և որդիների, կոնսերվատիզմի և առաջընթացի թեմաներին, ուրբանիզացիայի խնդրին, որոնք արդիական են ինչպես բասկերի, այնպես էլ հայերի մոտ: Զուգահեռներ անցկացվեցին նաև այդ երկու երկրների միջև: Չնայած հետաքրքիր զրույցին, որոշ լրագրողներ չսպասեցին մինչև մամուլի ասուլիսը կավարտվի, քանի որ մյուս հանդիպման հերոսուհին փառատոնի պատվավոր հյուր Ժակլին Բիսեթն էր:
Համաշխարհային կինոյի աստղը զարմացրեց լրագրողներին իր անկեղծ ժպիտով և բաց շփումով: Առաջին հերթին նա պատմեց, թե ինչպես իրեն գիշերվա կեսին երկու անգամ արդուկ բերեցին:
Հերթական վարպետության դաս անցկացնելու հնարավորությունը ստացավ կինոարվեստը գնահատող հայ հանդիսատեսի կողմից արդեն սիրված իրանցի դերասան Հոմայուն Էրշադին: Ինչպես և սպասվում էր, հարցերից շատերը վերաբերվում էին նրա ստեղծագործության երկու թեմաներին` ականավոր իրանցի ռեժիսոր Աբաս Քիառուսթամիի հետ համագործակցությունն ու մասնակցությունը Ջիվան Ավետիսյանի «Վերջին բնակիչը» ֆիլմին:
«Նոր դանիական կինոյի» ծրագիրը մեկնարկեց դանիացի ռեժիսոր Թոմաս Վինդենբերգի «Կոմունա» հանճարեղ ֆիլմով: Թոմասը «Դոգմա» ուղղության հիմնադիրներից ու Լարս Ֆոն Տրիերի «զինակից ընկերն» է:
Կենսուրախ Ժիլիմիր Ժիլնիկի հետ շփումից չհագեցած հանդիսատեսը բաց չթողեց նրա հետ «Թումո» ստեղծարար տեխնոլոգիաների կենտրոնում հանդիպելու հնարավորությունը:
«Շեքսպիրյան ծրագրի» շրջանակում նույն կենտրոնում անցկացվեց նաև Ռոման Պոլանսկու «Մակբեթ» ֆիլմի ցուցադրությունը: Կինոյի սիրահարները նաև հնարավորություն ունեցան բաց երկնքի տակ դիտելու Բրիտանիայի թատրոնի և կինոյի դասական Փիթեր Բրուք «Լիր արքան»։
Փառատոնային օրվա վերջում «Փարաջանովի թալեր» մրցանակ ստացավ ռեժիսոր-վավերագրող Ռուբեն Գևորգյանցը, ինչից հետո տեղի ունեցավ նրա հայտնի «Պատրիարքի աշունը» ֆիլմի ցուցադրությունը, որը պատմում է մեծ սցենարիստ, պոետ և նկարիչ, ինչպես նաև հայ ժողովրդի բարեկամ Տոնինո Գուերայի ստեղծագործական ուղու մասին:
Sputnik Արմենիան «Ոսկե Ծիրան» փառատոնի տեղեկատվական հովանավորն է:
