ԵՐԵՎԱՆ, 16 հուլիսի-Sputnik. Համաշխարհային կինոյի աստղ Ժակլին Բիսեթը «Ոսկե ծիրան» միջազգային կինոփառատոնում արժանացավ «Փարաջանովյան թալեր» պարգևին՝ համաշխարհային կինեմատոգրաֆում ունեցած ավանդի համար:
Նա շնորհակալություն հայտնեց փառատոնի կազմակերպիչներին իրեն ցուցաբերած պատվի համար: Sputnik Արմենիայի հետ զրույցում Բիսեթն ասաց, որ հիասքանչ տպավորություններ է ստացել կինոփառատոնից և խոստովանեց, որ համտեսել է ամենահամեղ ծիրանը:
Կինոփառատոնի փակմանը տեղի ունեցավ տարբեր անվանակարգերում պարգևների և մրցանակների հանձնման արարողությունը:
Հայաստանի կինեմատոգրաֆիստների միության «Մշակույթի ասպետ» տասներորդ մեդալը շնորհվեց կինոքննադատ Կիրիլ Ռազլոգովին:
«Էկումենիկ ժյուրի» և «Արծաթե ծիրան» անվանակարգերում մրցանակներ ստացավ իրանցի ռեժիսոր Սեյեդ Հադի Մոհաղեղի «Անմահը» ֆիլմը: Այն պատմում է 60-ամյա տղամարդու մասին, որը փորձում է ինքնասպանություն գործել:
Լավագույն ֆիլմ և լավագույն խաղարկային ֆիլմ անվանակարգերում մրցանակի արժանացավ խորվաթ ռեժիսոր Բրանկո Շմիդտի «Բալերի անունները» ֆիլմը:
Ռեժիսորը նշեց, որ տուն վերադառնալուն պես ձեռնամուխ կլինի նոր ֆիլմի նկարահանումներին, որը կներկայացնի 14-րդ «Ոսկե ծիրանին»:
«Հայկական համայնապատկեր» ծրագրի շրջանակում մրցանակ շնորհվեց ռեժիսոր Դավիթ Սաֆարյանի «28:94 տեղական ժամանակով» ֆիլմին՝ լավագույն սցենարի համար:
Նույն անվանակարգում լավագույն կարճամետրաժ ֆիլմ ճանաչվեց Վիգեն Արմենյանի «Ընձառյուծի լռությունը» ֆիլմը:
«Վավերագրական կինո» անվանակարգում մրցանակի արժանացավ Առնո Խայաջանյանի «Քարքարոտ ճամփաներ» ժապավենը:
Լավագույն վավերագրական ֆիլմ ճանաչվեց Եվգենի Գրիգորևի «Ձախ ափի հանդիման» ֆիլմը:
Կինոփառատոնի հատուկ մրցանակին արժանացավ հայկական ծագումով ռուսաստանցի կինոռեժիսոր Աննա Մելիքյանը:
«Ոսկե ծիրան» կինոփառատոնի 7-րդ օրը նշանավորվեց կարմիր գորգով, մրցանակների հանձնումով և Դարդեն եղբայրների «Անհայտ կինը» ֆիլմի ցուցադրմամբ, որը մայիսին ներառված էր Կաննի կինոփառատոնի մրցութային ծրագրում:
