Լաուրա Սարգսյան, Sputnik.
Լոռու սարերում` Ախթալա քաղաքում է գտնվում հեքիաթային ամրոց հիշեցնող առանձնատունը։ Դա մեծ հայ բարերար Միքայել Արամյանցի տունն է, որը նա կառուցել է 1885թ-ին դստեր համար, որը հիվանդ էր տուբերկուլյոզով։
Քանդականախշ պատշգամբները, լայն պատերը, բարձր առաստաղները և ծաղկած ծառերով ճեմուղիները հիշեցնում են հին Թիֆլիսի ճարտարապետությունը։ Զարմանալի չէ, չէ՞ որ այդ քաղաքի հետ սերտորեն կապված է Արամյանցի կյանքը և գործունեությունը։ Միքայել Արամյանցը ծնվել է Ղարաբաղի Քյաթուկ գյուղում, բայց ապրել և աշխատել է Թիֆլիսում։
«Կոմունիստների օրոք տունը խլել են իմ նախնիներից, սակայն մենք աշխատում ենք, որպեսզի այն վերածենք թանգարանի։ Դա պատմական շենք է` կապված շրջանի և քաղաքի հետ»,- Sputnik Արմենիայի թղթակցի հետ զրույցում ասաց Միքայել Արամյանցի թոռը` լոնդոնցի գործարար Ալեքսանդր Ջանոևը։
Ջանոևների ընտանիքը վերջին հինգ տարիներին այցելում է Հայաստան, սակայն այս անգամ Ալեքսանդրը ժամանել է մի քանի պատճառով։ Նա ցանկանում է ցույց տալ դստերը պատմական հայրենիքը, ինչպես նաև տեղեկություններ հավաքել իր նախապապի գործունեության մասին։
«Մենք Հայաստանից կմեկնենք Ղարաբաղ` Քյաթուկ գյուղ, որտեղ ծնվել է Միքայել Արամյանցը, դրանից հետո կգնանք Թբիլիսի և կհանգրվանենք Mariott հյուրանոցում, որը կառուցել է Արամյանցը»,- ասաց Ջանոևը։
Նա խոստովանեց, որ կնոջ հետ արդեն եղել է Ղարաբաղում, իսկ Հայաստան հաճախ է ժամանում, քանի որ ցանկանում է ավելի շատ բան իմանալ իր արմատների մասին։
«Այստեղ ես ինչ-որ առանձնահատուկ բան եմ զգում, կարծես վերադառնում եմ արմատներիս։ Դա հաճելի զգացում է, որը չեմ կարող բացատրել», — ասաց Արամյանցի թոռը։
Նրա խոսքով` Հայաստանի և Վրաստանի հետ արմատների մասին նա իմացել է տատիկից` Աննա Արամյանցից, որը Միքայելի դուստրն է։ Նա էլ պատմել է Թբիլիսիում և Ախթալայում կյանքի մասին։
«Լոնդոնի մեր տանը պահում ենք Ախթալայի տան լուսանկարները` արված 1911թ-ին։ Տատիկս շատ սիրում էր երկու քաղաքները. Թբիլիսին` իր բազմազգության, Ախթալան` բնության համար»,- հիշում է Ջանոևը։
Նա հարգում և գնահատում է տքնաջան աշխատանքը և ջանքերը, որոնք գործադրել է իր նախապապը։
«Նա կրթաթոշակներ է տրամադրել, կառուցել դպրոցներ, հիվանդանոցներ ինչպես Վրաստանում, այնպես էլ Հայաստանում։ Նա Թբիլիսիում շենք է կառուցել, որտեղ այժմ գտնվում է կրթության նախարարությունը։ Սակայն այդ ամենը չի գնահատվել», — ասաց Ջանոևը։
Այսօր Ջանոևի ընտանիքը բնակվում է Լոնդոնում։ 20-րդ դարի սկզբին հենց այստեղ է հաստատվել Աննա Արամյանն ամուսնու` հայտնի ճարտարապետ Ալեքսանդր Ռոտինյանի հետ։
«Հայրս նույնպես թբիլիսահայ է, նա մորս հետ ծանոթացել է Լոնդոնում, որտեղ ծնվել եմ ես։ Այսօր աշխատանքի բերումով բնակվում եմ երկու երկրներում` Անգլիայում և Ֆրանսիայում»,- ասաց Ջանոևը։
Արամյանցի թոռը ֆինանսիստ է և լինելով մի քանի ընկերությունների տնօրենների խորհրդի անդամ`շարունակում է նախապապի գործունեությունը` բարեգործությունը։ Նրա կինը կիսով չափ անգլիացի է, կիսով չափ` բելգիացի, նա սերում է տոհմիկ նավաստիների դինաստիայից, իսկ 22-ամյա դուստրը երաժշտության ուսուցչուհի է։
