ԵՐԵՎԱՆ, 19 դեկտեմբերի — Sputnik, Լիլիթ Հարությունյան. Եթե լինեն դերասաններ, որոնց տաղանդը կհամապատասխանի «Համազգային» թատրոնին, իմ ռեժիսուրային և գեղագիտությանը, ես ամեն ինչ կանեմ, որ նրանք մեր ընտանիքի անդամ դառնան, ասաց Սոս Սարգսյանի անվան պետական «Համազգային» թատրոնի նոր գեղարվեստական ղեկավար Վիգեն Չալդրանյանը։
«Բնականաբար, թատերախմբի կազմում հնարավոր են փոփոխություններ, չէ՞ որ սա կենդանի օրգանիզմ է։ Մեր դռները միշտ բաց են։ Ելքը փակ է, բայց մենք ոչ ոքի բռնի ուժով չենք պահելու, քանի որ հնարավոր է` ինչ-որ մեկի պատկերացումներն արվեստի, թատրոնի մասին չհամապատասխանեն ընդհանուրի հետ»,- ասաց նա։
Չալդրանյանի խոսքով` թատերախմբի ճակատագիրը պարզ կլինի ժամանակի ընթացքում։
«Գիտեմ, որ կան դերասաններ, որոնք տվյալ պահին չկան մեր խմբում, բայց ես շատ եմ ուզում, որ նրանք լինեն այստեղ` իմ կողքին։ Մնացածը ցույց կտա ժամանակը», — նշեց նա։ Չալդրանյանը խոստովանեց, որ նա ժամանակավորապես կհեռանա կինոյի ոլորտից, քանի որ պարտավոր է ամբողջությամբ նվիրվել թատրոնին։
