ԵՐԵՎԱՆ, 17 հունվարի — Sputnik, Վիկտորյա Պիսարենկո. Մենք ապրում ենք հետինդուստրիալ հասարակությունում, որտեղ նորաձև հագուստի արտադրությունը զանգվածային է։ Բոլորը միանման տեսք ունեն, կարելի է ասել`չեն տարբերվում իրարից։ Մի՞թե ֆեյշնը ճգնաժամ է ապրում։ Սակայն նորաձևություն թելադրող ստեղծագործ մարդու համար ելք միշտ կա։ Անհրաժեշտ են միայն մի քանի նոր գաղափարներ, որպեսզի զգեստապահարանդ թարմացվի հետաքրքիր զգեստներով։
Պետք չէ Միլան գնալ`գնումներ կատարելու համար, այլ պարզապես բավարար կլինի անցնել Երևանի կենտրոնով։
Այստեղ ժամանակակից նորաձևության զարգացման յուրօրինակ միտումներով հետաքրքվողների համար մեծ «թիրախային տարածք» կա։ Հենց այսպես է անգլերենից թարգմանվում արտասովոր նախագծի անվանումը, որն իրագործել է դիզայներական յոթնյակը` Ինգա և Էլեն Մանուկյանները, Ալլա Նշանյանը, Նելլի Սերոբյանը, Արուս Պողոսյանը, Մարգարիտա Սիրեկանյանը և Անի Մկրտչյանը։
Այդ «կոնցեպտ սթորում» իր ուրույն ոճը կգտնի նա, ով կցանկանա համադրել արևմտյան թրենդները` չմոռանալով ազգային նորաձևության առանձնահատկությունների մասին։ Այստեղ ներկայացված են Loom Weaving, Zgest, Nshanyan, Nelly Serobyan, NagashCouture, Petoor Clothing և այլ բացառիկ աշխատանքներ։ Եվա Թանգյանի կողմից ներկայացված (Tangian) տպավորիչ, վառ կիտրոնագույն վերարկուն անտարբեր չի թողնի նույնիսկ տղամարդկանց։ Խոսելով ազգային նորաձևության նշանակության մասին` չի կարելի չհիշել LilitMakaryanDesign-ը։
Լիլիթը ոչ միայն կուտյուրիե է, այլև արտասովոր աքսեսուարների` մեծ երկրաչափական տեսք ունեցող պայուսակների հեղինակ։ Դիզայները իր աշխատանքում կիրառում է Հայաստանի համար ավանդական գույները` նռնակարմիրը, ծիրանագույնը և երկնագույնը։ Պայուսակների մյուս առանձնահատկությունը հայկական զարդանախշերն են։
Նրանք, ովքեր չեն վախենում էքսպերիմենտներից կարող են այցելել «SONČESS»-ի Instagram-ի էջը, սակայն ավելի լավ կլինի մտնել բրենդի «Boulvard Plaza» շոուռումը։ Այն նույնպես կենտրոնացած է «թիրախային տարածքում»։ Նրանց առաջարկներն անկեղծ հիացմունք կպարգևեն նորաձև հագնվող ամենաերեսառած մարդկանց։ Բրենդը յուրահատուկ ձևվածքի և տարբեր ֆակտուրաների համադրություն է։ Բաց ուսեր` վերարկուի վրա, խոշոր ցանց` նախաբազուկ հատվածում, նորաձև պաետկաներ` բրդյա գործվածքների համադրությամբ. սրանք այն դետալներն են, որոնք ստեղծում են ոչ թե զանգվածային պահանջարկ ունեցող ապրանքներ, այլ թիրախային սպառման արտադրանք։
Թբիլիսին ժամանակին անվանում էին Կովկասյան Փարիզ։ Վրաստանի մայրաքաղաքում լավ են հասկանում նորաձևությունը և կարողանում են գեղեցիկ ու ճաշակով հագնվել։ Սակայն, կարծես, մոտ ժամանակներում Թբիլիսին ուժեղ և, ամենակարևորը, ոճային մրցակից կունենա։ Հայրենական դիզայներները կոնցեպտուալ առումով զարգացնում են նորաձև հագուստի շուկան և բացառված չէ, որ հայկական «թիրախային տարածքը» կկարողանա ընդլայնել իր ազդեցությունը երկրի սահմաններից դուրս` տպավորություն գործելով ողջ ֆեյշն աշխարհի վրա։
