Լաուրա Սարգսյան, Sputnik.
Թբիլիսիի Black and Whitte պատկերասրահն այսօր մարդաշատ էր ու աղմկոտ: Հյուրերը դիտում էին ցուցադրված դիմանկարները, որոնց հեղինակը հայտնի լուսանկարիչ Գերման Ավագյանն էր: «Կովկասյան գործընկերություն» կազմակերպության առաջին միջոցառումը՝ «Թբիլիսիի դեմքերը» ցուցահանդեսը, արդեն հասցրել էր լինել Ստամբուլում:
«Ստամբուլի բնակիչները «Թբիլիսիի դեմքերը» առաջին անգամ տեսան 2010թ-ի նոյեմբերին, ուր ինձ հրավիրել էին լուսանկարների միջազգային փառատոնին (Fotoistanbul փառատոն՝ խմբ.)», — Sputnik Արմենիայի թղթակցի հետ զրույցում ասաց Ավագյանը:
Մեր զրուցակիցը դեռ մանկուց տարվել է լուսանկարչությամբ և հիշում է, թե ինչպես է 12 տարեկանում մի ամբողջ տարի խնդրել ծնողներին, որպեսզի հեծանվի փոխարեն լուսանկարչական խցիկ գնեն:
Լուսանկարիչը ծնվել է Թբիլիսիում, բայց բնակվել է այնտեղ 2006-2010թթ-ին: ԱՄՆ տեղափոխվելուց առաջ Ավագյանը որոշել է որպես հիշատակ իր հետ տանել մարդկանց յուրահատուկ կերպարները:
Այդպես հայտնվել են Թբիլիսիի բնակիչների դիմանկարները, որոնց մեջ կան տարբեր ազգությունների, հավատի և մասնագիտությունների տեր մարդիկ: Ցուցադրությունում ներկայացված 40 դիմանկարների միջոցով լուսանկարիչն ընդգծել է Թբիլիսիի բազմաշերտությունը և բազմամշակութայնությունը: Նա բոլոր լուսանկարների համար որպես ֆոն է ընտրել պատերը՝ համարելով, որ դա կօգնի հանդիսատեսին ուշադրությունը կենտրոնացնել մարդկային անհատականության վրա:
Նախագծի մասնակիցներից և միջոցառման հյուրերից մեկը Վրաստանի մահմեդականների վարչության նախկին ղեկավար, շեյխ Վագիֆ Ասպերովն էր: Շեյխը և լուսանկարիչը ծանոթացել էին մի քանի տարի առաջ՝ Թբիլիսիի մզկիթում:
«Գերմանը տաղանդավոր մարդ է, որը կարողացել է փոխանցել Թբիլիսիի կերպարը և բնավորությունը: Ես ինքս մանկուց հետաքրքրվել եմ լուսանկարչական արվեստով և շատ բան եմ տեսել, բայյց նման հոգևոր վերելք վաղուց չէի զգացել»,- ասաց Ակպերովը Sputnik Արմենիայի թղթակցի հետ զրույցում:
Շեյխը կարծում է, որ միայն Թբիլիսիում կարելի է տեսնել քաղաքանությունից և կաղապարներից դուրս արվեստ: Այստեղ կողք կողքի ապրում են հայերն ու ադրբեջանցիները, քրդերն ու թուրքերը, ռուսներն ու վրացիները, ասորիներն ու հույները:
Վրաստանում Հայաստանի նախկին դեսպան, «Կովկասյան գործընկերություն» կազմակերպության հիմնադիր և ղեկավար Հովհաննես Մանուկյանը կարծում է, որ Թբիլիսին խաղաղ, արդյունավետ և գեղեցիկ համագործակցության օրինակ է հանդիսանում:
«Կովկասյան գործընկերությունը» գործում է շուրջ 3 ամիս, թեև հայ-վրացական երկխոսության համար հարթակ ստեղծելու գաղափարը վաղուց է եղել:
«Մեր կազմակերպության հիմնական նպատակը տարբեր սոցիալական խմբերի միջև կապերի և բարեկամության հաստատումն է: Օգտագործլեով ժողովրդական դիվանագիտության գործիքները՝ մենք կարող ենք զգալիորեն բարելավել մեր հասարակությունների միջև հարաբերությունները»,- ասաց Մանուկյանը:
Այդ հասարակական կազմակերպությունը կնպաստի ժողովուրդների միջև կենսագործունեության տարբեր ոլորտներում կապերի ստեղծմանը, ինչն իր հերթին կօգնի խորացնել հարաբերությունները քաղաքական մակարդակում: Գաղտնիք չէ, որ Վրաստանը Հայաստանի առանցքային տարածաշրջանային գործընկերներից է:
Մանուկյանը խոստանում է, որ այս տարին արդյունավետ կլինի, քանի որ «Կովկասյան գոգրծընկերության» շրջանակում նախատեսվում են բազմաթիվ նախագծեր ինչպես Հայաստանում, այնպես էլ Վրաստանում:
