03:05 22 փետրվարի 2018
Ուղիղ եթեր
Ավետարան

Հայկական միջնադարյան Ավետարանները կներկայացվեն Կիևում

© Guardian
Մշակույթ
Ստանալ կարճ հղումը
2610

Մարտի 1-ին Կիևի Վ.Ի.Վերնադսկու անվան Ուկրաինայի ազգային գրադարանի մասնաշենքում կայանալու է «Հայ գիրքն Ուկրաինայում. 400-ամյա պատմություն» խորագրով բացառիկ ցուցահանդեսի հանդիսավոր բացման արարողությունը:

ԵՐԵՎԱՆ, 1 մարտի — Sputnik. Առաջին անգամ լայն հասարակայնությանը կներկայացվեն եզակի փաստաթղթեր, որոնք կցուցադրեն հայ և ուկրաինացի ժողովուրդների բարեկամական կապերը: Այս մասին հաղորդում է analitikaUA.net-ը:

«Հայ գիրքն Ուկրաինայում. 400-ամյա պատմություն» խորագրով ցուցահանդեսում կներկայացվեն 14-րդ, 16-րդ և 17-րդ դարերի ձեռագրեր, Հայաստանին վերաբերող՝ 19-րդ դարի-20-րդ դարասկզբի հրատարակություններ, հայկական երաժշտության պատմությանը նվիրված գրքեր:
Շնորհանդեսը կանցկացնի հայտնի պատմաբան, Ուկրաինայի հայերի միության պատմամշակութային ժառանգության հարցերի կոմիտեի ղեկավար Դավիթ Դավթյանը:

Ինչպես նշում են կազմակերպիչները, հայ համայնքը նկատելի տեղ է գրավում Ուկրաինայի պատմության մեջ: «Ուկրաինայի հայերի բազմադարյա պատմությունն ու մշակույթը բացառիկ երևույթներ են, ստեղծագործական տքնանք, որը զուգորդված է ինքնատիպ մշակույթի պահպանման հետ»:
Հայկական ձեռագրեր պատվավոր տեղ են զբաղեցնում Ուկրաինայի գրապահոցներում: Վերնադսկու անվան Ուկրաինայի ազգային գրադարանի ձեռագրերի ինստիտուտի ֆոնդերում, որոնք իրենց բովանդակությամբ ու ծավալով ամենամեծն են Ուկրաինայում, պահվում է հայերեն երեք Ավետարան, որոնք հայկական գրավոր ու գեղարվեստական մշակույթի հիանալի նմուշներ են: Հայկական ձեռագրերի թվում է նաև 17-րդ դարի հայ-լատիներեն բառարանը:

Ընդգրկուն ցուցահանդեսն այն նշանակալի ավանդի ցայտուն վկայությունն է, որ հայերը ներդրել են Ուկրաինայի մշակույթի մեջ և միաժամանակ ուկրաինացի ժողովրդի հարգանքի դրսևորումը Ուկրաինայի հայերի բազմադարյա գրավոր ու տպագիր եզակի ժառանգության նկատմամբ, որը պահվում ու պահպանվում է ուկրաինական պետության կողմից:

Ինչպես հայտնի է, Ուկրաինայի հայ համայնքն ամենախոշորներից ու կազմակերպվածներից մեկն Է: Հայերը նկատելի տեղ են գրավում Ուկրաինայի պատմության մեջ: Ժամանակակից Ուկրաինայի տարածքում հայերի հայտնվելը թվագրվում է 11-12-րդ դարերով: Ուկրաինական հողերում գտնվելու բազմադարյա պատմության ընթացքում հայերը ստեղծել են նյութական ու հոգևոր հսկայական ժառանգություն:

Գլխավոր թեմաներ