Լաուրա Սարգսյան, Sputnik.
Հին Թբիլիսիի համայնապատկերը, արևոտ Վրաստանի բնակիչները, ծեր կանանց տխուր աչքերն ու երիտասարդության վառ դեմքերը մեկ շաբաթ ներկայացված կլինեն Երևանի ցուցասրահներից մեկում։ Հայտնի վրացի լուսանկարիչ, Վրաստանի մշակույթի նախկին փոխնախարար Յուրի Մեչիտովի «Վրաստան-կրկնակի էջեր» ցուցահանդեսին կներկայացվ ի մոտ 150 կտավ։ Նախկին փոխնախարարը հավաքում էր դրանք քառասուն տարի։
«Սա իմ կյանքի մի մասն է, կյանքի հետ շփվելու մի մասը։ Այստեղ պատկերված են մարդիկ, որոնց հետ ես շփվել եմ։ Յուրաքանչյուր կտավի մեջ մի պատմություն է ամփոփված»,- Sputnik Արմենիայի թղթակցի հետ զրույցում ասաց Մեչիտովը։
Տասնյակ ճակատագրեր՝ տարբեր հանգուցալուծմամբ, կյանքի ողբերգական պահերով։ Այստեղ պատկերված է կնճռոտ մի կին՝ ձեռքին ավիավթարում զոհված աղջկա դիմանկարը, այնտեղ երեխա է պատկերված՝ դեմքի հանդարտ, դեռ կյանքի դժվարությունները չտեսած արտահայտությամբ։ Նրանց միջև հարմարավետ վրացական բակն է, որտեղ տարբեր ազգերի մարդիկ խաղաղ ապրում են միմյանց հետ։ Քիչ հեռու Ջավախքի հայերի պատկերով լուսանկարն է ցուցադրված, որը Աբխազիայի ճակատային գիծը և անհայտ ու անհոգ երիտասարդ տղային պատկերող կտավների կողքն է կախված։
Վրաստանի կրկնակի էջերը Երևանում կմնան մինչև շաբաթվա վերջ, այնուհետև լուսանկարներն ու դրանց հեղինակները կմեկնեն Ղազախստան։ Մայիսի 5-ից ցուցահանդեսը կուրախացնի Ալմաթիի բնակիչներին։
«Վրաստան-կրկնակի էջեր» ցուցահանդեսը դարձավ Վրաստանում Հայաստանի նախկին դեսպան Հովհաննես Մանուկյանի հիմնադրած «Կովկասյան գործընկերություն» կազմակերպության երկրորդ միջոցառումը։
«Առաջին անգամ Մեչիտովի հետ հանդիպեցինք 2012 թվականին։ Վրաստանում այդ ժամանակ փոխվեց իշխանությունը, և Մեչիտովը նոր էր նշանակվել մշակույթի նախարարության տեղակալի պաշտոնին։ Ես։ Որպես Հայաստանի դեսպան, գնացել էի նրա մոտ՝ քննարկելու մի շարք նախագծեր, որոնք մենք մտադիր էինք իրականացնել մշակույթի նախարարության հետ»,- Sputnik Արմենիայի թղթակցի հետ զրույցում նշեց Մանուկյանը։
Նա ասում է, որ շատ զարմացած է, քանի որ իր հնչեցված գաղափարները միանգամից ստացան վրացի պաշտոնյայի հավանությունը։ Նախկին դեսպանը զգաց, որ ինչ-որ բան այնպես չէ. կամ Վրաստանում նավթ են հայտնաբերել և այդքան շատ փող ունեն, որ հնարավոր է ամեն ինչ դասավորել, կամ, իրականում, Մեչիտովը դեռ չի ադապտացվել։
Մեկ ամիս անց Մանուկյանը կրկին հանդիպում ունեցով Մեչիտովի հետ, որն այդ ընթացքում կարողացավ հարմարվել պաշտոնին և արդեն հասկանում էր, թե ուր է ընկել։
«Այն ժամանակ ինձ թվաց, որ նա մոտ ապագայում կլքի պաշտոնը։ Այդպես էլ եղավ։ Ազատ մարդու, նկարչի համար բարձրաստիճան պաշտոնյայի աթոռն հարմարավետ չէ, այն սահմանափակում է ստեղծագործական մտքի թռիչքը»,- ասաց Մանուկյանն` ավելացնելով, որ այդ օրվանից նրանք մտերմացան։
Մշակութային երկխոսության զարգացումը «Կովկասյան գործընկերություն» կազմակերպության ուղղություններից մեկն է, որը մի քանի ամիս է, ինչ գործում է։ Կազմակերպությունը մտադիր է մի շարք միջոցառումներ իրականացնել ինչպես Վրաստանում, այնպես էլ Հայաստանում. կլոր սեղաններ և քաղաքագետների, հասարակական և քաղաքական գործիչների ու դիվանագետների մասնակցությամբ գիտաժողովներ։
«Կովկասյան գործընկերության» առաջին միջոցառումը Թբիլիսիում անցկացված հայտնի հայ լուսանկարիչ և ֆոտոլրագրող Գեղամ Ավագյանի «Թբիլիսիի դեմքերը» ցուցահանդեսն էր։
Русская версия
