ԵՐԵՎԱՆ, 25 ապրիլի — Sputnik. Ապրիլի 27-ից-30-ը Ա. Սպենդիարյանի անվան օպերայի և բալետի ազգային ակադեմիական թատրոնում տեղի կունենա «Երևան առաջին միջազգային օպերային փառատոնը», որը նվիրված կլինի հայ մեծանուն տենոր Գեղամ Գրիգորյանին: Այս մասին Sputnik Արմենիային հայտնեցին Ազգային օպերայի և բալետի թատրոնի հանրային կապերի բաժնից։
Փառատոնն իրականացվում է ՀՀ նախագահի տիկին Ռիտա Սարգսյանի բարձր հովանու ներքո:
«Երևան առաջին միջազգային օպերային փառատոնը» նախատեսվում է անցկացնել ամեն տարի Երևանում: Փառատոնի շրջանակում հանդես կգան համաշխարհային ճանաչում ունեցող օպերային երգիչներ:
«Երևան առաջին միջազգային օպերային փառատոնի» գեղարվեստական ղեկավարն է Ա. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար, ՌԴ վաստակավոր արտիստ Կոնստանտին Օրբելյանը:
Ապրիլի 27-ին ելույթ կունենան սոպրանո Հասմիկ Գրիգորյանը (Լիտվա), տենոր Սթիվեն Կոստելլոն (ԱՄՆ) և բարիտոն Ռոդիոն Պողոսովը (ՌԴ): Կներկայացվեն ֆրանսիական, իտալական և գերմանական օպերաներից արիաներ: Համերգի դիրիժոր՝ Կոնստանտին Օրբելյան (ՌԴ վաստ. արտիստ):
Ապրիլի 28-ին հանդես կգան սոպրանո Բարբարա Ֆրիտտոլին (Իտալիա) և Մետրոպոլիտեն օպերայի հանրահայտ արտիստ, բարիտոն Գեորգի Գագնիձեն (Վրաստան)՝ Հայաստանի պետական երիտասարդական նվագախմբի մասնակցությամբ: Բարբարա Ֆրիտտոլին Մետրոպոլիտեն և Լա Սկալա օպերային թատրոնների, Վիեննայի պետական օպերային թատրոնի երգչուհի է: Համերգի դիրիժոր՝ Կոնստանտին Օրբելյան (ՌԴ վաստ. Արտիստ):
Ապրիլի 30-ին կներկայացվի Ջ. Վերդիի «Տրավիատա» օպերան՝ սոպրանո Հասմիկ Թորոսյանի, բարիտոն Առնոլդ Քոչարյանի և անվանի ամերիկացի օպերային տենոր Սթիվեն Կոստելլոյի մասնակցությամբ: Ներկայացումը կղեկավարի հրավիրյալ դիրիժոր՝ Քրիս Ռուսմանը (Մեծ Բրիտանիա):
