Արմենուհի Մխոյան, Sputnik
Նախ Բուրսայի Նիլուֆերի շրջանի «Նազիմ Հիքմետ» մշակույթի կենտրոնում, ապա նաև Ստամբուլի «Դեպո» ցուցասրահում ներկայացվեցին Վազգեն Փահլավունի Թադևոսյանի, Հայկ Ադամյանի, Վահան Թոփչյանի, Աղավնի Ղազարյանի, Էդ Թադևոսյանի, Լևոն Ֆլջյանի, Արմեն Տեր-Մկրտչյանի, Գևորգ Սարգսյանի, Հրաչ Վարդանյանի, Կարեն Բարսեղյանի, Գոհար Մարտիրոսյանի և Գագիկ Ղազարեի ստեղծագործությունները, ընդհանուր առմամբ՝ 50 աշխատանք և ևս 3 վիդեո-արտ: Ի դեպ, ամենափոքր մասնակիցը՝ Աղավնի Ղազարյանը 12 տարեկան է: Շարժմանը միացած հայ արվեստագետները Հայաստանից էին, ԱՄՆ-ից ու Ֆրանսիայից:
«Մարդկանց մոլորակը» շարժման գաղափարը սկիզբ է առել Արմեն Տեր-Մկրտչյանի համանուն ցուցադրությունից՝ «Գալերի-25» պատկերասրահի նախաձեռնությամբ, ժամանակի ընթացքում դարձել է շարժում՝ իր մեջ կրելով Անտուան դը Սենտ Էքզյուպերիի՝ «Միակ իսկական շքեղությունը մարդկային հաղորդակցության շքեղությունն է» արտահայտությունը:
«Մարդկանց մոլորակը» ցուցադրությունը «Գալերի 25»-ի նախաձեռնությամբ վերածվել է արտ-շարժման, որին միացել ու դեռ միանում են բազմաթիվ երկրների արվեստագետներ: Շվեցարիա, Իտալիայի, Իրան. այս երկրներն արդեն «Մարդկանց մոլորակը» շարժման իրենց դեսպաներն ունեն՝ ոմանք միացել են գրքերով, մի մասը պերֆորմանսներով ու տարբեր ցուցադրություններով, սակայն ինչպես տեղեկացրեց «Գալերի 25»-ի հիմնադիր Ալեքսան Տեր-Մինասյանը, շարժմանը միացող մարդկանց թիվն ավելանում է:
«Նախաձեռնությունն իր մեջ ներգրավում է տարբեր արվեստագետների ու ստեղծագործողների: Մարդկային շփման կարևորագույն գաղափարին ամեն մեկը յուրովի է միացել կամ միանում»,- նշեց Տեր-Մինասյանը՝ ավելացնելով, որ շարժումը միշտ բաց է ցանկացած արվեստագետի ու ստեղծագործողի լավ ու հետաքրքիր գաղափարի համար:
Շարժումը իրականացնում է համերգներ, ցուցահանդեսներ, պերֆորմանսներ և ուսումնասիրություններ:
Թուրքիայում ներկայանալու առաջարկությունն արել էր Անադոլու Կուլտուր (Anadolu Kultur) կազմակերպությունը: Նախաձեռնությանն աջակցել է Եվրամիությունը՝ «Աջակցություն Հայաստան-Թուրքիա կարգավորման գործընթացին. 2-րդ փուլ» ծրագրի շրջանակում:
«Սա հրաշալի ու խորհրդանշական ցուցադրություն է: «Մարդկանց մոլորակ»-ի ու մարդկանց հաղորդակցության շքեղության մասին գաղափարը ցայտուն արտահայտված է աշխատանքներում: Կարծում եմ՝ նմատաիպ ծրագրերը կօգնեն անլուծելի թվացող խնդիրների լուծմանն ու պարզ մարդկային հարաբերությունների ստեղծմանը»,- նշեց Անադոլու Քյուլթուրի նախագահ Օսման Կավալան:
«Մարդկանց մոլորակը» շարժման գաղափարակիցները «Միակ իսկական շքեղությունը մարդկային հաղորդակցության շքեղությունն է» արտահայտության կարևորությանը վստահելով՝ հավատացած են, որ համախոհների թիվը կավելանա:
