ԵՐԵՎԱՆ, 15 հունիսի — Sputnik. Արամ Խաչատրյանի անվան միջազգային մրցույթում երրորդ տեղը գրավեց բարիտոն Գագիկ Վարդանյանը Երևանից, երկրորդը` Ղազախստանից օպերային երգիչ, բարիտոն Ազամատ Ժելտիրգուզովը, իսկ առաջին տեղը ժյուրին հանձնեց Հայաստանից սոպրանո Ջուլիետա Ալեքսանյանին։
Հաղթող եռյակը կստանա հատուկ մրցանակ 10 000, 5000 և 3000 դոլարի չափով։
Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար Կոնստանտին Օրբելյանը, որը գլխավորում էր մրցույթի ժյուրին, շնորհակալություն հայտնեց ՀՀ առաջին տիկին Ռիտա Սարգսյանին և Հայաստանի մշակույթի նախարար Արմեն Ամիրյանին ՀՀ–ում մշակույթի զարգացմանն աջակցելու համար։
Մաեստրոն նշեց, որ Հայաստան է ուղարկել ամենատարբեր մարդկանց, սակայն «այնպես է ստացվել, կարծես մենք միասին հանգստացել ենք ինչ-որ տեղ և ընկերություն ենք անում ամբողջ կյանքում»։ Օրբելյանը երախտագիտություն հայտնեց գործընկերներին մրցույթի ընթացքում 10-օրյա հաճելի աշխատանքի համար։
«Ավելի քան 40 երաժիշտ հայերեն կատարեց Կոմիտասի, Ռոմանոս Մելիքյանի, Էդվարդ Միրզոյանի ստեղծագործությունները։ Տարբեր մեկնաբանություններով, տարբեր ազգության մարդկանց կատարմամբ հայկական երաժշտություն լսելը գերագույն երջանկություն է»,– ավելացրեց մաեստրոն։
Օրբելյանը ելույթից հետո «Երգեր Ստալինի մասին» պարտիտուրա (հետագայում վերանվանվել էր «Երգ հայրենիքի մասին») նվիրեց Խաչատրյանի անվան թանգարանին։ Պարտիտուրան Խաչատրյանի մակագրությամբ էր։
Խաչատրյանի անվան միջազգային մրցույթի հոգաբարձուների խորհրդի նախագահ Արմեն Սմբատյանը լրագրողներին հայտնեց, որ մասնակիցները կատարեցին Կոմիտասի ստեղծագործությունները, ում Խաչատուրյանն աստվածացնում էր։
«Մեզ համար կարևոր է, որ Կոմիտասին նվիրված ակցիաները համաշխարհային ճանաչում ձեռք բերեն։ Նախորդ մրցույթը մեզ օգնեց այդ հարցում»,– ասաց Սմբատյանը։
Այս տարի Արամ Խաչատրյանի անվան միջազգային XIII մրցույթի շրջանակներում առաջին անգամ վոկալիստներ մասնակցեցին։ Մրցույթն անցկացվում է ՀՀ առաջին տիկին Ռիտա Սարգսյանի բարձր հովանու ներքո։
