ԵՐԵՎԱՆ, 28 հունիսի – Sputnik. Հայտնի ֆրանսահայ երգիչ ու երգահան Մարթեն Յորգանցը սկսել է երեխաների համար երգեր գրել 80–ականներին` հայրենիք գալուց հետո։ Այդ մասին նա ասաց Sputnik Արմենիա մամուլի ակումբում։
Հայտնի «Ճկույթիկ» և «Այբ, բեն, գիմ» երգերի հեղինակի խոսքով` իր առաջին այցը Հայաստան ճիշտ ժամանակին էր։
«Իմ երգերն արդեն 30 տարի է՝ երգում են, և ես հույս ունեմ, որ ևս 30 տարի երեխաներին երգեր եմ նվիրելու։ Կարևորն այն է, որ հայ երեխաներն այնքան տաղանդավոր են, որ միանգամից կարողանում են անգիր անել երգը։ Ես եկա Հայաստան 1988 թվականի երկրաշարժից հետո և այստեղ գրված երգերը նվիրեցի երեխաներին։ Ինձ ուրախացնում էին նրանց ժպիտներն ու անմիջականությունը։ Մինչ այդ ես միայն մեծերի համար էի գրում։ Իմ երգացանկը փոխվեց, ես «Ճկույթիկ» դարձա»,– կատակով նշեց Յորգանցը։
Նա նշեց, որ նրա ստեղծագործությունների հաջողության գլխավոր գաղտնիքը պարզությունն է։
«Սրանք երգեր են, որոնք ես նրանց լեզվով եմ հորինել, դրանք հոգեհարազատ են երեխաներին… Հոգու խորքում ես դեռ երեխա եմ, չեմ կարողանում մեծանալ։ Իրականում ես դեռ 14 տարեկան էլ չկամ»,– ասաց երաժիշտը։
Հայաստան ամեն մի այցը նոր նախագծեր, նոր երաժշտություն է։
«Հետաքրքիր նախագծեր կան, որոնք մենք ուզում ենք իրականացնել իմ ընկեր Եղիշե Պետրոսյանի հետ… Ես շատ ուրախ եմ նորից Հայաստանում լինելու համար։ Երևանը գեղեցիկ է, ամենուր երիտասարդների եմ տեսնում, բոլորը երջանիկ են թվում»,– ասաց երգահանը` հայտնելով նաև, որ շուտով Հայաստանի քաղաքացու անձնագիր կստանա։
Յորգանցի և «Արձագանք» խմբի հիմնադիր, երգիչ և երգահան Եղիշե Պետրոսյանի միջև ընկերությունը ստեղծվել է 80–ականներին, երբ արտիստն առաջին անգամ Հայաստան այցելեց։
«Դեմիրճյանի անվան ՄՀՀ–ում համերգների քանակությամբ (86– խմբ.) Մարթեն Յորգանցին դեռ ոչ ոք չի գերազանցել։ Դա նշանակում է, որ ժողովուրդը սիրել է նրան հայրենասիրության, անկեղծության և ուղղամտության համար։ Նա մինչև այժմ վայելում է հանդիսատեսի սերը, և ինչպես նշում է երգահանը, Հայաստանում նա «թթվածին է ստանում»,– իր հերթին նշեց Պետրոսյանը։
Յորգանցի համար հայրենիքը դոպինգ է։ Վերջին անգամ ֆրանսահայ երգահանը Հայաստանում եղել է հինգ տարի առաջ, իսկ այսօր ընկերները նորից մտածում են նոր նախագծերի իրականացման մասին։
«Իհարկե, դրանք մանկական ծրագրեր են լինելու, հետաքրքիր ստարտափներ։ Չենք բացահայտի բոլոր գաղտնիքները, բայց լավ լուրերի սպասեք։ Դա շատ պատասխանատու և աշխատատար փուլ է»,– հավելեց Պետրոսյանը։
Առաջիկայում երաժիշտները մի քանի նոր երգ կձայնագրեն, բայց, ինչպես ասաց Պետրոսյանը, մեծ համերգներ դեռ չեն լինելու։
Մարթեն Յորգանցը Հայաստանում կլինի մինչև հուլիսի 9–ը։
