ԵՐԵՎԱՆ, 17 հուլիսի — Sputnik. Հուլիսի 14-ից 16-ը Սևանա լճի «Վիշապ» լողափում կայացավ «Սիվիլ արտ» մշակութային հասարակական կազմակերպության կազմակերպած «Հուսո առագաստ-2017» հեղինակային երգի միջազգային փառատոնը, որն ընթանում է 3-րդ տարին անընդմեջ։
Այս տարի «Հուսո առագաստը» միջազգային ձևաչափ ուներ, քանի որ փառատոնին մասնակցում էին օտարազգի հյուրեր Ռուսաստանից, Վրաստանից և Ուկրաինայից։
Սևանի ափին ընթացող եռօրյա փառատոնին ներկայացել են մի քանի տասնյակ բարդեր, այդ թվում՝ «Լավագույն տասնյակ» անվանակարգում ընդգրկված նորանուն հեղինակ-կատարողներ։
Հնչել են ոչ միայն հին ու սիրված երգեր, այլև բազմաթիվ նոր ստեղծագործություններ։ Եզրափակիչ համերգը մեկնարկել է Ռուբեն Հախվերդյանի ելույթով։ Նրա ներկայացրած նոր երգին հաջորդել են հյուրերի ելույթները, վկայագրերի, շնորհակալագրերի և խորհրդանշական նվերների հանձնման արարողությունը, 3 տասնյակից ավելի բարդերի մասնակցությամբ համերգը։
Փառատոնի պաշտոնական մասն ավարտվել է ավանդաբար կատարվող «Հուսո առագաստ» երգով և նախորդ օրվա օրինակով ուշ գիշերին շարունակություն ստացել խարույկի շուրջ։
2017 թվականի «Հուսո առագաստը» ոչ միայն աշխարհագրական առումով էր ընդգրկուն, այլև մասնակցել ցանկացողների։
Հայտատուները կային Արարատի, Սյունիքի, Լոռու, Կոտայքի, Գեղարքունիքի, Արմավիրի, Վայոց Ձորի մարզերից և Երևանից, իսկ հեղինակային երգի սիրահարների պակաս բնավ չզգացվեց նաև այս տարի։
Ի դեպ, հանդիսատեսի շարքում էին Գյումրու և Վանաձորի մանկատան երեխաները, որոնց համար փառատոնը մշակութային միջավայրում լինելու, լավ ժամանակ անցկացնելու հերթական հնարավորություն էր։
Նշենք, որ ամենամյա փառատոնի նպատակը հեղինակային երգի ասպարեզում նորանուն ստեղծագործողների բացահայտումն է, նրանց բեմ տրամադրելը, ստեղծագործական առաջընթացին նպաստելը։
