ԵՐԵՎԱՆ, 21 օգոստոսի — Sputnik. Սերժ Թանգյանի ծննդյան օրը մեկ այլ հայտնի հայկական ռոք խմբի՝ «The beautified project-ի» առաջնորդ Անդրե Սիմոնյանը Sputnik Արմենիայի հետ զրույցում խոսեց Թանկյանից ստացած իր տպավորությունների մասին, պատմեց հետաքրքիր դեպքեր իրենց հանդիպումից։
«Հիշում եմ 1997 թվականը, երբ «System Of A Down-ը» նոր ձևավորված խումբ էր: Ես գնացել էի Լոնդոն «Slayer» և «Sepultura» խմբերի համատեղ համերգին, որը բացում էր «System Of A Down-ը»: Այն ժամանակ շատ տպարվորվել էի նրանց յուրահատուկ ռիթմերով: Անգլիացիները նույնպես զարմացած էին: Չէին հասկանում՝ ինչպես պարել, ինչպես գլուխ շարժել: Հետո, արդեն 3 տարի անց, նրանք թողարկեցին «Թոքսիսիթի» ալբոմը:
Այդ ժամանակ ես որպես հաշվապահ աշխատում էի նրանց մոտ: Լոնդոնում շփվեցինք, իսկ հետո՝ արդեն տարիներ անց, Թանկյանին նվիրեցի Արագիլ երգը, որը նա շատ էր հավանում: Ես էլ նրանցով, իհարկե, շարունակ պարծենում եմ՝ որպես հայ: «System Of A Down-ի» շնորհիվ Անգլիայի ռոքերները իմացան, թե Հայաստանը որտեղ է: Հետո, երբ ես ասում էի` Հայաստանից եմ, անգլիացիները արդեն գիտեին, որ դա «System Of A Down-ի» երկիրն է»,–պատմում է Անդրե Սիմոնյանը:
Ճշմարիտ է ասել Արշիլ Գորկին՝ «Հայկական հարցի մասին ոչ թե պետք է բղավել փողոցներում, այլ արվեստում»: Այդպես արեցին Սերժը և տղաները՝ Հայաստանի դրոշը ծածանելով Երկիր մոլորակով մեկ:
