ԵՐԵՎԱՆ, 20 հոկտեմբերի–Sputnik. Ֆլորենցիայի բիենալեին` եվրոպական ամենահեղինակավոր ժամանակակից արվեստի ցուցահանդես–փառատոններից մեկին, հայազգի Արման Նուռը ներկայացավ «Ճանճ» և «Ճանճ–Էվոլյուցիա» աշխատանքներով։ Դրանց կոնցեպցիայի իմաստը սիրո քարոզն էր։ Այդ մասին այսօր կայացած ասուլիսի ժամանակ պատմեց Արման Նուռը։
««Ճանճ» աշխատանքը փոքր տեսակի արձանիկ է։ Այդ ճանճը պատմում է սիրո մասին։ Ինչո՞ւ եմ հենց նրան ընտրել, որ պատմի սիրո մասին. որովհետև նա ամենաատելի էակներից մեկն է։ Որպեսզի կարողանանք սիրել այն, ինչ ատում ենք, պետք է կարողանանք ատելիի աչքերով նայել աշխարհին։ Դա անելու համար վերցնում ենք այդ ճանճը, շրջում և վերածում ակնոցի, դնելով աչքերին` տեսնում եք ճանճի ճիշտ կրկնված բիոլոգիական տեսողությամբ` 2490 ֆասեդով»,– պատմեց հեղինակը։
Իսկ «Ճանճ–Էվոլյուցիան» շատ մեծ չափի` 3 մետրանոց պղնձաձույլ արձան։ Դա էլ պատմում է այն բանի մասին, որ էվոլյուցիայով պրոգրես ապրելուց հետո մարդկությունը մեծանում են, ծանրանում ու ավելի մեծ տարածք զբաղեցնում` կորցնելով կապը բնության հետ։
«Մեծ ճանճը մյուսի պես ևս տրանսֆորմացվում է, փակվում, աչքերը պտտվում են, ու դու տեսնում ես աշխարհն ագրեսիվ, կարմիր և ընդհանրացված գույներով։ Հայտնվում ես փականի մեջ։ Հետևաբար, պրոգրեսը մի օր դառնում է մարդկության համար փական»,– պատմեց Արման Նուռը։
Մեծ ճանճի միջոցով նա քարոզում է` պահպանելով պրոգրեսը, վերադարձնել հայացքը դեպի բնություն։
Արման Նուռը պատմեց, որ Ֆլորենցիայի բիենալեի ամբողջ պատմության ընթացքում Հայաստանն առաջին փոքր պետությունն է, որը հաղթող է ճանաչվում։ Ավելին, նրա տաղավարը մոտ 10 օր լի է եղել մարդկանցով։ Այնպես էր ստացվել, որ մինչև հաղթողի անունը հրապարակելը բոլորը Նուռին շնորհավորում էին`վստահ լինելով, որ հենց նա է հաղթողը։ Հակառակ արվեստով հետաքրքրվողների օրինակին` ժյուրիի անդամները ցուցադրաբար չէին մոտենում Նուռի տաղավարին։ Բայց, ինչպես հաղթանակած հեղինակն է նշում, արդարությունն, ի վերջո, հաղթում է։
