09:09 16 դեկտեմբերի 2018
Ուղիղ եթեր
  • USD484.87
  • GBP609.92
  • EUR547.37
  • RUB7.30
Նվագախումբ

Օտարներն ուզում են, բայց չեն կարողանում նվագել հայերի ստեղծագործությունները. ինչո՞ւ

© Sputnik /
Մշակույթ
Ստանալ կարճ հղումը
5510

Եվրոպական երաժիշտները հրաժարվում են նվագել հայ կոմպոզիտորների ստեղծագործությունները, երբ տեսնում են, որ պարտիտուրաները թվայնացված չեն։

ԵՐԵՎԱՆ, 14 մարտի — Sputnik. Հայ կոմպոզիտորների սիմֆոնիկ ստեղծագործություններն արտասահմանում մեծ պահանջարկ են վայելում, բայց արտասահմանյան նվագախմբերը չեն կարողանում ներառել դրանք իրենց երկացանկերում, Sputnik Արմենիա մուլտիմեդիոն մամուլի կենտրոնում հրավիրված ասուլիսի ժամանակ ասաց Հայ կոմպոզիտորական արվեստի փառատոնի գեղարվեստական մասի պատասխանատու Սարգիս Բալբաբյանը։

Մարտի 5-ին 9-ը Երևանում կայացավ Հայ կոմպոզիտորական արվեստի IX փառատոնը, որն այս տարի նվիրված էր կոմպոզիտոր, մանկավարժ, ԽՍՀՄ ժողովրդական արտիստ Գրիգոր Եղիազարյանի 110-ամյակին։

«Մենք արտասահմանյան երաժիշտներից նամակներ ենք ստանում, որոնցում նրանք խնդրում են ուղարկել այս կամ այն հայ կոմպոզիտորների ստեղծագործությունները։ Մենք հաճախ չենք կարողանում բավարարել նրանց խնդրանքը, քանի որ պարտիտուրաները հիմնականում ձեռքով են գրված, իսկ եվրոպացի երաժիշտները դրանցով երբեք չեն նվագում», — ասաց Բալբաբյանը։

Ստացվում է` հայ կոմպոզիտորների ստեղծագործությունները նվագելու ցանկություն կա, բայց իրականացնելն անհնար է, քանի որ շատերը թվայնացված չեն։ Փառատոնի ներկայացուցիչները ստանձնել են նոտաների թվայնացման առաքելությունը։ Այս տարի թվայնացվել են Եղիազարյանի ստեղծագործություններից մի քանիսը։

Փառատոնի շրջանակում հնչել են Գրիգոր Եղիազարյանի, դասականների ու երիտասարդ կոմպոզիտորների ստեղծագործությունները, առաջին անգամ նվագել են նաև հայկական սփյուռքի ներկայացուցիչների ստեղծագործությունները։

Կոմպոզիտոր Վարդան Աճեմյանը կարծում է, որ վերջին ժամանակաշրջանում հայ կոմպոզիտորներն անարդարացիորեն մոռացության են մատնվել։ Հայ կոմպոզիտորական արվեստի փառատոնը փորձում է լրացնել այդ բացթողումը։

«Մենք պետք է գնահատենք մեր արվեստը, և սիմֆոնիկ նվագախումբն իր վրա է վերցրել այդ առաքելությունը։ Եղիազարյանի ստեղծագործությունները տասնյակ տարիներ չէին հնչել, սակայն նա գրել է բազում ստեղծագործություններ, որոնք հնչել են աշխարհի տարբեր երկրներում ու ներկայացրել Հայաստանը», — ասաց Աճեմյանը։

Հայաստանի պետական երիտասարդական նվագախմբի դիրիժոր Սերգեյ Սմբատյանը կարևորեց միջոցառումը, որի նպատակն է հայ հասարակությանն ու աշխարհին ցույց տալ մեր երաժշտական արժեքները։

«Փառատոնին մենք նոր ձևաչափով ենք ներկայացնում մեր սիրելի կոմպոզիտորների փոքր-ինչ մոռացված անունները», — Sputnik Արմենիա մամուլի կենտրոնում ասաց Սմբատյանը։

Նախորդ տարի փառատոնը նվիրած էր հայ և խորհրդային կոմպոզիտոր Հարո Ստեփանյանին։

Գլխավոր թեմաներ