ԵՐԵՎԱՆ, 26 մարտի — Sputnik. 11 տարեկան քանոնահարուհի Մերի Մուսինյանին հաջողվել է իր նվագով հիացնել ամերիկացի կոնգրեսականներին և ճապոնացիներին։ Այս մասին այսօր Sputnik Արմենիա մամուլի կենտրոնում կայացած ասուլիսում ասաց «Նոր անուններ» փառատոնի և ծրագրի համակարգող, երաժշտագետ Նոնա Ոսկանյանը։
Սպենդիարյանի անվան երաժշտական դպրոցի աշակերտուհի Մերի Մուսինյանը 11 տարեկանում արդեն Ռուսաստանի, ԱՄՆ-ի, Ֆրանսիայի, Շվեյցարիայի, Մալթայի, Իսպանիայի, Ավստրիայի երաժշտական մրցույթների դափնեկիր է։ Նա ելույթ է ունեցել աշխարհի տարբեր անկյուններում` Մայամիից մինչև Տոկիո, Կրասնոյարսկից մինչև Սեուլ։ Նվագել է Ջիվան Գասպարյանի, Ռուսաստանի նախագահական նվագախմբի հետ։ Մասնակցել է Մաքսիմ Գալկինի «Լավագույնը» շոուին։
«Մի անգամ ԱՄՆ կատարած հերթական այցի ժամանակ Մերին ելույթ է ունեցել ամերիկյան Կոնգրեսում։ Հայկական քանոնը և դուդուկի հնչյունները (դուդուկ նվագել է մեկ այլ մասնակից Հայաստանից` խմբ.) այնքան են հիացրել կոնգրեսականներին, որ նրանք հանել են հեռախոսները և սկսել են նկարել», — ասաց Ոսկանյանը։
Մերին իր նվագով հիացրել է նաև «խիստ» ճապոնացիներին հեռավորարևելյան շրջագայության ժամանակ, որի շրջանակում այցել է Չինաստան, Ճապոնիա և Կորեա։
Մերիի ուսուցչուհին` Երևանի պետական կոնսերվատորիայի պրոֆեսոր Ծովինար Հովհաննիսյանը, վստահ է, որ տաղանդավոր աղջիկը առաջիկայում կոնսերվատորիա ընդունվելու բոլոր հնարավորություններն ունի։
«Մերին արդեն այնպիսի ստեղծագործություններ է նվագում, որոնք երբեմն կատարում են կոնսերվատորիայի ուսանողները», — բացատրեց նա։
Մերին հյուրախաղերին զուգահեռ հասցնում է լավ սովորել, նա Երևանի 181 դպրոցի 6-րդ դասարանի աշակերտուհի է, երաժշտական կրթությունը ստանում է Սպենդիարյանի անվան երաժշտական դպրոցում։
Բացի այդ, աղջիկը հասցնում է մենահամերգներ տալ Հայաստանում։ Մերիի երկրորդ մենահամերգը տեղի կունենա մարտի 29-ին, ժամը 19։00-ին Կոմիտասի անվան Կամերային երաժշտության տանը։
Մերին երազում է, որ իր քանոնի ձայնը հնչի հոլիվուդյան բոլոր ֆիլմերում, և քանոնը աշխարհում տարածված գործիք դառնա։
Առաջիկայում «Նոր անուններ» ծրագրի շրջանակում Մերին հյուրախաղերով կմեկնի ԱՄՆ, Մալթա, Ֆրանսիա և Ռուսաստան։
Հատկանշական է, որ Մերի Մուսինյանն իր ընտանիքի միակ երաժիշտն է, հարազատներից ոչ մեկը չի զբաղվել երաժշտությամբ։ Քանոնը միշտ սիրել է աղջկա մայրը` Անուշ Աղաջանյանը, որը և աղջկան տարել է պարապմունքների։
