ԵՐԵՎԱՆ, 27 մարտի — Sputnik. Վենետիկի գավառագիտական կազմակերպությունները հայկական մշակութային երեկոների շարք կանցկացնեն, հայտնում է Il Popolo Veneto պարբերականը։ Միջոցառումները կանցկացվեն 2018 թվականի մարտի 30-ից հոկտեմբերի 30-ը։
Միջոցառումներից մի քանիսը կանցկացվեն Վենետիկի Սուրբ Ղազար կղզու Մխիթարյան միաբանության եկեղեցում, մյուսները` Սան Նիկոլո կաթոլիկ վանքում, մի շարք միջոցառումներ էլ կանցկացվեն գրադարաններում և հյուրանոցային սրահներում։
Միջոցառումները կմեկնարկեն մարտի 30-ին գրականության ընթերցումներով։ Ապրիլի 13-ին կներկայացվեն գրող Սոնա Օրֆալյանի` երեխաների համար գրված պատմվածքները (Օրֆալյանը ծնվել է Լիբիայում, ապրում է Իտալիայում)։ Ապրիլի 19-ին Կանյաչո գրադարանում հայկական ժողովրդական հեքիաթների մասին դասախոսություններ կհնչեն։ Իսկ հոկտեմբերի 19-ին իտալահայ գրող Անտոնիա Արսլանը հանդիպում կունենա ընթերցողների հետ` «Արտույտների ագարակից մինչև փողոց Զմյուռնիայում» (նրա գրքերի վերնագրերի հիման վրա)։
Մայիսին Մարսելի օպերայի և ֆրանսիական Լա Սյոտա քաղաքի կոնսերվատորիայի երաժիշտները հայկական դասական ստեղծագործություններ կնվագեն։
Տարվա ընթացքում նաև երկու ֆիլմ կցուցադրեն. մայիսի 25-ին` ռեժիսոր Ֆատիհ Ակինի «Սպին», հունիսի 18-ին` Ատոմ Էգոյանի «Արարատը», հոկտեմբերի 22-ին` Պաոլո և Վիտորիո Տավիանիի «Արտույտների ագարակը» (ֆիլմերը քաջ հայտնի են հայ հանդիսատեսին)։
Կներկայացվի նաև հայկական խոհանոցը։ Ապրիլին կկազմակերպվի Սոնա Օրֆալյանի «Հայաստանի խոհանոցը։ Ճանապարհորդություն դեպի խոհարարական մշակույթ» գրքից վերցված բաղադրատոմսերով պատրաստված ուտեստների համտեսը։ Եվս մեկ համտես կանցկացվի հունիսի 9-ին։ Այստեղ մարմնական սննդին զուգահեռ կներկայացվի նաև հոգևորը. արևմտահայ պոեզիայի դասական Դանիել Վարուժանի «Հացին երգը» ժողովածուի (Վարուժանի պոեզիան իտալերեն թարգմանել է Անտոնիա Արսլանը) ընթերցումներ կլինեն։
Մի քանի երեկոներ էլ կանցկացվեն նաև Սուրբ Ղազար կղզում` Մխիթարյան միաբանության հայկական վանքում։ Հանդիպումներից մեկը նվիրված է լինելու վանքի տպագրատանը (որը հաջորդ տարի կդառնա 230 տարեկան)։
