ԵՐԵՎԱՆ, 24 ապրիլի — Sputnik. Իեհուդի Մենուհինի անվան երիտասարդ ջութակահարների միջազգային մրցույթում հայ ջութակահարուհի Դիանա Ադամյանն առաջին մրցանակին է արժանացել 16-21 տարեկանների խմբում, գրում է The Telegraph-ը։
Իսկ Ավստրալիան ներկայացնող 10 տարեկան Քրիստիան Լին դարձել է մրցույթի ամենաերիտասարդ հաղթողը (մինչև 16 տարեկանների կարգում)։ Նա առաջին տեղը կիսել է սինգապուրցի երաժիշտ` 11-ամյա Քլոե Չուայի հետ։
«Ադամյանին 15 000 շվեյցարական ֆրանկ է շնորհվել, իսկ Չուային և Լիին` 10 000, բոլոր երեք հաղթողները կարող են մեկ տարվա ընթացքում օգտագործել իտալական հին ջութակը», — գրված է հաղորդագրության մեջ։
Իեհուդի Մենուհինի անվան երիտասարդ ջութակահարների միջազգային մրցույթն անցկացվել է Ժնևի Victoria Hall համերգասրահում։ Միջոցառմանը մասնակցել են 44 ջութակահար։
Մրցույթը, որն անցկացվում է 1983 թվականից, կարիերա ստեղծելու հարցում լավ մեկնարկ է եղել ականավոր երաժիշտներ Տասմին Լիթլի, Ռեյ Չենի, Յուլյա Ֆիշերի համար։
