ԵՐԵՎԱՆ, 3 մայիսի- Sputnik, Սառա Գալստյան. Ուղիղ 25 օր՝ մայիսի 1-25-ը Մեծ Բրիտանիայի Քարդիֆ քաղաքում (Ուելսի մայրաքաղաք) տեղաբնակներն ու այցելուները կարող են վայելել հայկական արվեստն ու մշակույթը:
«Հայկական արվեստ և մշակույթ» անունը կրող ցուցահանդեսը բացվել է Ուելսի խորհրդարանի շենքում:
Հայ նկարչուհի Մարիամ Թորոսյանը, որն արդեն 6 տարի է Ուելսում է ապրում, 3 տարի անընդմեջ պայքարում էր այս ցուցահանդեսի իրավունքը ստանալու համար:
«Սա իսկական հաղթանակ է ինձ համար: Ես այնքան էի ուզում հայ նկարիչների գործերը ցուցադրել Ուելսում: Այստեղ շատ բան չգիտեն հայերի ու Հայաստանի մասին: Իսկ նման միջոցառումները լավ առիթ են մեր երկիրը ներկայացնելու համար»,- իր ոգևորությունն է Sputnik Արմենիայի հետ կիսում երիտասարդ նկարչուհին ու ավելացնում, որ Ուելսի բոլոր պատգամավորներին հետաքրքրել էր ցուցահանդեսը: Իսկ պատգամավոր Ջեննի Ռաֆբոնին այնքան էր գերել հայ նկարիչների գործերը, որ նա որոշել է անձամբ աջակցել դրա կայացմանը:
7 հայ և մեկ ուելսցի նկարիչի 54 աշխատանք 25 օր շարունակ կշոյեն այցելուների աչքերը: Ի դեպ, նրանցից 6-ն ապրում և ստեղծագործում են Հայաստանում և միայն 2-ը՝ նրա սահմաններից դուրս: Ֆաենբերգ Սարգսյանի, Սևադա Սարգսյանի, Լեմս Ներսիսյանի, Սոս Հարությունյանի, Մարիամ Թորոսյանի, Ռուզաննա Փիլիպոսյանի, Արայիկ Օհանյանի և ուելսցի Լլինոս Թոհմասի Հայաստանի մասին ստեղծագործություններն արդեն զարդարում են Ուելսի խորհրդարանը։
«Փորձում եմ այստեղ Հայաստանը ներկայացնել արվեստի և մեր բազմադարյա մշակույթի միջոցով: Ուելսի բնությունը նմանեցնում եմ Հայկական լեռնաշխարհին կամ գուցե ինձ համար եմ փնտրում նմանության, կապ, որովհետև, ապրելով այստեղ, ես հոգով Հայաստանում եմ»,-մեզ հետ զրույցում ասում է Մարիամ Թորոսյանը, ում աշխատանքներից 20-ը ներկայացված են այս ցուցահանդեսին: Նրա նկարներում հայկական Աղավնաձորի և Ուելսի բնապատկերների նմանությունն է, Գյումրին՝ իր ողջ վեհությամբ և Հայաստանի շատ այլ տեսարժան վայրեր:
Ի դեպ Ուելսի խորհրդարան օրական 100-150 կողմնակի մարդ է այցելում: Նկարների մասին պատմող ցուցանակներում ցուցահանդեսի կազմակերպիչները ներկայացրել են հայոց գրերի, խաչքարերի, մշակույթի, հայ ժողովրդի բազմադարյա պատմությունը:
Հայ նկարիչների վրձնով անմահացած հայկական բնապատկերները, մեր երկրի տեսարժան վայրերի ու զարմանահրաշ բնության նկարները ուելսցիներին ու հյուրերին կպատմեն Հայաստանի ու հայի մասին, կփոխանցեն հայկական ջերմությունն ու կներկայացնեն այս փոքր երկրի անբացատրելի ձգողականությունը:
Նկարչուհի Մարիամ Թորոսյանը ծնվել է 1991 թ.-ն, Երևանում: Մասնագիտական կրթություն ստացել է Երևանի Խաչատուր Աբովյանի անվան մանկավարժական համալսարանի Գեղարվեստի ֆակուլտետի Կերպարվեստ և գծագրություն բաժինում, որն ավարտել է կարմիր դիպլոմով: Բազմաթիվ ցուցահանդեսներ է ունեցել Երևանում: 2012-ից Մեծ Բրիտանիայում բնակվող հայ նկարչուհին արդեն 3 անհատական ցուցահանդես է ունեցել Ուելսի Քարդիֆ քաղաքում:
