ԵՐԵՎԱՆ, 14 մայիսի — Sputnik. Հայաստանը պատմամշակութային հարուստ ժառանգություն ունեցող հիանալի երկիր է, վստահեցնում է «Դուարտ» առցանց-պատկերասրահի հիմնադիր Անդրա դե Կրիֆը, որը Երևան է ժամանել Armenian Art Fair եռօրյա տոնավաճառին մասնակցելու նպատակով։
Անդրան երկրորդ անգամ է Հայաստանում։ Armenian Art Fair տոնավաճառին նա իր պատկերասրահն է ներկայացնում. «Հայաստանը հիանալի երկիր է, իսկ ձեր պատմությունը, հարուստ մշակույթը ոգեշնչում է արվեստագետներին։ Ես մասնակցում են տոնավաճառին իմ առցանց-պատկերասրահով», — Sputnik Արմենիայի թղթակցի հետ զրույցում ասաց Անդրան։
Նա ծնվել է Նիդեռլանդներում, հիմա ապրում է Դուբայում, շատ է ճանապարհորդում իր առցանց-պատկերասրահով, որը մի քանի տարի առաջ է ստեղծել։ Նա Հայաստան է բերել ռուս ու հոլանդացի նկարիչների աշխատանքները։ Ցուցահանդեսում ներկայացված են Անգլիայի, Ռուսաստանի, Սիրիայի, Նիդեռլանդների ու Հայաստանի վարպետների աշխատանքները։ Մյուս տարի կազմակերպիչները պատրաստվում են ընդլայնել մասնակիցների աշխարհագրությունը։
Նրանց կարծիքով` հայկական Art Fair-ը հենց դրանով պետք է տարբերվի լոնդոնյանից, թբիլիսյանից և մյուսներից։
«Հայաստանում առաջին անգամ է այդպիսիս միջոցառում անցկացվում, որը ամենամյա կդառնա։ Նպատակն է ծանոթացնել արվեստագետներին ու արվեստի սիրահարներին։ Բացի այդ, միջոցառումը կնպաստի Հայաստանում արվեստի զարգացմանը», — Sputnik Արմենիայի թղթակցի հետ զրույցում ասաց Armenian Art Fair (AAF) միջազգային տոնավաճառի համադրող Եվա Խաչատրյանը։
Կազմակերպիչները հույս ունեն, որ Հայաստանը կդառնա մշակույթների, արվեստների հանդիպման տարածաշրջանային հարթակ։ Նրանք վստահ են, որ մեր երկիրն այդ հարցում մեծ հնարավորություններ ունի։ Հայկական արտ-ֆեյրի առանձնահատկություններից մեկն էլ այն է, որ ճանապարհ է բացվում սկսնակ արվեստագետների համար։ Միջոցառմանն ընդհանուր առմամբ ներկայացվել են քսան մասնակցի աշխատանքներ։
