ԵՐԵՎԱՆ, 4 դեկտեմբերի — Sputnik, Արմենուհի Մխոյան. ՀՀ նախագահ Արմեն Սարգսյանն այսօր՝ դեկտեմբերի 4-ին, տիկնոջ՝ Նունե Սարգսյանի հետ միասին Գյումրիում էր: Այս անգամ նախագահը Գյումրի էր գնացել դիտելու 2016 թ.-ի ապրիլյան օրերի մասին պատմող «Հարսանիք թիկունքում» ներկայացումը: Անահիտ Աղասարյանի հեղինակած երկու գործողությամբ դրաման նվիրված է ապրիլյան քառօրյայի հերոսներին:
Պատասխանելով լրագրողների հարցերին նախագահը նշեց՝ ներկայացումը իրականում Գյումրու պատմությունն է:
«Ծիծաղի ու լացի խառնուրդ. չգիտես երբ ծիծաղես, երբ լաս և այդ հումորը՝ ցավի միջից եկած հումորը, 30 տարի առաջ ես ինքս էլ եմ տեսել, երբ ուսանողների հետ երկրաշարժից հետո եկա այստեղ և այդ հսկայական ողբերգության օրերին մարդկանց հանդիպեցի, որ այդ ողբերգության մեջ կարողանում էին դառը ծիծաղել: Հոյակապ ներկայացում է: Կարծում եմ՝ Հայաստանում ամեն տեղ պետք է ցուցադրվի, քանի որ սա միայն գյումրվա պատմություն չէ, դա մեր ժողովրդի պատմությունն է: Սա իրական պատմություն է որտեղ կա ծիծաղ, հումոր, խորը ցավ ու ողբերգություն»:
«Հարսանիք թիկունքում» ներկայացման հիմքում մի ընտանիքի պատմություն է, որը խորհրդանշում է ամբողջ հայ ժողովրդին: Զավակի հարսանիքի օրը հնչում է ապրիլյան քառօրյայի գույժն ու տակնուվրա անում հույզերը՝ փոխելով ներկան ու ապագան:
Ներկայացման ռեժիսորն է Լյուդվիգ Հարությունյանը, նկարչական ձևավորումն իրականացրել է Գարեգին Եվանգուլյանը, զգեստների ձևավորումը՝ Լուսինե Խաչատրյանը, իսկ երաժշտական ձեւավորումը՝ երգիչ, կոմպոզիտոր Հայկ Հակոբյանը (Հայկո):
Հավելենք, որ վաղը ևս ՀՀ նախագահը ծրագրել է լինել Գյումրիում՝ մի շարք հանդիպումներ ունենալով:
