ԵՐԵՎԱՆ, 30 հունվարի — Sputnik. Մոսֆիլմ կոնցեռնի տարածքում ծավալուն շինարարություն է նախատեսվում։ Այս մասին ՌԻԱ Նովոստիի հետ հարցազրույցում ասել է «Մոսֆիլմի» գլխավոր տնօրեն Կարեն Շահնազարովը։
Նրա խոսքով` կինոկոնցեռնային համալիրի ու նկարահանման տաղավարի շինարարությունը նախատեսվում է սկսել այս տարվա մարտին ու ավարտել 2021 թվականին։ Շահնազարովը նշել է, որ Ռուսաստանում հնագույնն ստուդիան հունվարի 30–ին նշում է իր 95–ամյակը։
«Կինոկոնցեռնային համալիր է կառուցվելու չորս սրահներով ու դեպի Մոսֆիլմովսկայա փողոց ելքով, կառուցվելու է նաև ևս մեկ մեծ տաղավար։ Շինարարությունը պետք է սկսվի այս տարվա մարտին ու 2021 թվականին պետք է ավարտվի։ Այս ամենը պետության հաշվին չի արվում», – ասել է Շահնազարովը։
Միաժամանակ, նրա խոսքով, կառավարությունը որոշում է կայացրել, պետությունը հաստատել է նախագիծը, սակայն դրա վրա ոչ մի կոպեկ չի ծախսել։
Ավելի վաղ` 2013 թվականին Վլադիմիր Պուտինը հանձնարարել էր «Մոսֆիլմի» նորացման ու զարգացման նախագիծ մշակել։ «Մոսֆիլմի» նախագծի իրականացման համար ներդրումների ընդհանուր ծավալը կկազմի մոտ հինգ միլիարդ ռուբլի` առանց բյուջետային միջոցների կիրառությամբ։