ԵՐԵՎԱՆ, 24 մայիսի — Sputnik. Առաջին անգամ Հայաստանում մենահամերգով ելույթ կունենա համաշխարհային օպերայի աստղ, վաստակավոր արտիստ Վերոնիկա Ջիոևան:
Աշխարհի լավագույն բեմերը գրաված երգչուհին, ում կատարումները բարձր են գնահատել The New York Times-ը և այլ հեղինակավոր պարբերականներ, ելույթ կունենա դիրիժոր Էդուարդ Թոփչյանի ղեկավարած Հայաստանի ազգային ֆիլհարմոնիկ նվագախմբի նվագակցությամբ։
«Աշխարհի լավագույն օպերային երգչուհիներից մեկն ինքն է հետաքրքրվել մեր նվագախմբով։ Մենք չէինք կարող բաց թողել նման հնարավորությունն ու նրան Հայաստան չհրավիրել։ Մեծ սիրով սպասում ենք նրան Երևանում», – Sputnik Արմենիայի թղթակցի հետ զրույցում ասաց ֆիլհարմոնիկ նվագախմբի մենեջեր Աստղիկ Դալլաքյանը։
Մինչ այդ` մայիսի 27–ին, Վերոնիկա Ջիոևան կհանդիպի հայաստանցի լրագրողների հետ ու կպատասխանի նրանց հարցերին։
Օպերային երգչուհի Վերոնիկա Ջիոևան ծնվել է 1979 թվականին Հարավային Օսեթիայում։ Հյուսիսային ու Հարավային Օսեթիայի ժողովրդական արտիստ է։ 2006 թվականին ընդունվել է Նովոռոսիյսկի օպերայի և բալետի թատրոն։
2011 թվականին նա մասնակցել է «Մեծ օպերա» օպերային երգիչների համառուսական հեռուստամրցույթին ու առաջին տեղն է զբաղեցրել։ 2012 թվականին եղել է Մեծ թատրոնի հրավիրված մենակատարը։