ԵՐԵՎԱՆ, 6 նոյեմբերի — Sputnik. Հայաստանի Հանրապետության ժողովրդական արտիստ, մեծանուն կոմպոզիտոր Տիգրան Մանսուրյանը պարգևատրվել է «Հայրենիքին մատուցած ծառայությունների համար» 1-ին աստիճանի շքանշանով:
Ինչպես տեղեկացնում են ՀՀ նախագահի մամուլի ծառայությունից, Մանսուրյանը պարգևատրվել է հանրապետության նախագահ Արմեն Սարգսյանի հրամանագրով՝ երաժշտարվեստի զարգացման գործում ներդրած նշանակալի ավանդի և ակնառու ձեռքբերումների համար:
Նախագահական նստավայրում Արմեն Սարգսյանն այսօր պետական բարձր պարգևը հանձնել է մեծանուն կոմպոզիտորին:
Արմեն Սարգսյանը շնորհավորել է մաեստրոյին՝ մաղթելով քաջառողջություն, ստեղծագործական նոր ձեռքբերումներ և անսպառ եռանդ: «Դուք վաղուց արժանացել եք մեր ժողովրդի սիրուն: Բայց դեռ անելիք ունեք. որքան շատ ժառանգություն թողնեք, այնքան հարուստ կլինենք մենք»,- նշել է նախագահ Սարգսյանը:
Հիշեցնենք, որ կոմպոզիտոր Տիգրան Մանսուրյանն այս տարի նշում է իր ծննդյան 80–ամյակը։ Նա ծնվել է 1939թ.–ի հունվարի 27–ին, Բեյրութում։ Նրանց ընտանիքը հայրենիք է ներգաղթել 1940–ականներին։
Հիշեցնենք նաև, որ Արցախի Հանրապետության նախագահ Բակո Սահակյանը ևս կոմպոզիտոր Տիգրան Մանսուրյանին պարգևատրել է «Երախտագիտություն» մեդալով` 80-ամյա հոբելյանի կապակցությամբ։
Ոգևորիչ մարտահրավեր. Մանսուրյանի գործերը կհնչեն Ստեփանակերտում, Երևանում և Գյումրիում
