ԵՐԵՎԱՆ, 13 դեկտեմբերի — Sputnik. ՀՀ կրթության, գիտության, մշակույթի և սպորտի նախարարության ենթակայությամբ գործող թատրոններն ու թանգարանները կաշխատեն Ամանորի տոնական օրերին։ Այսօր լրագրողների հետ հանդիպման ժամանակ այս մասին ասաց ԿԳՄՍ նախարարի տեղակալ Արա Խզմալյանը։
«Բոլորն ասում են, որ Ամանորը նշելու «սեղանային մշակույթն» իրեն սպառել է։ Այս նախաձեռնությամբ մենք փորձում ենք քայլ առ քայլ հասնել նրան, որ տոնն իսկապես ընտանեկան դառնա, և մարդը կարողանա իր ընտանիքի հետ վայելել տարատեսակ մշակութային ներկայացումները»,–ասաց Խզմալյանը` նշելով, որ առանց հասարակության աջակցության ու ցանկության հնարավոր չի լինի մշակութային բարեփոխումներ իրականացնել։
Այս նախաձեռնությանը կամավոր սկզբունքով միացել են Երևանի մի շարք թանգարաններ։ 2020 թվականի հունվարի 1-5–ը ներառյալ, ժամը 12։00–17։00–ը կգործեն Ե. Չարենցի անվան գրականության և արվեստի թանգարանը, Մարտիրոս Սարյանի տուն–թանգարանը, Կոմիտասի թանգարան–ինստիտուտը, Հովհաննես Թումանյանի թանգարանը, Սերգեյ Փարաջանովի թանգարանը, Երվանդ Քոչարի թանգարանը, Ռուսական արվեստի թանգարանը, Հայաստանի ազգային պատկերասրահը։
Դեկտեմբերի 31–ից մինչև հունվարի 5-ը ներառյալ կաշխատեն նաև թատրոնները` Հ. Պարոնյանի անվան երաժշտական կոմեդիայի պետական թատրոնը, Գ. Սունդուկյանի անվան ազգային ակադեմիական թատրոնը, Երևանի Հովհաննես Թումանյանի անվան պետական տիկնիկային թատրոնը, Կ. Ստանիսլավսկու անվան ռուսական պետական դրամատիկական թատրոնը, Երևանի պետական կամերային թատրոնը, Խամաճիկների պետական թատրոնը, Ա. Սպենդիարյանի անվան օպերայի և բալետի ազգային ակադեմիական թատրոնը, Սոս Սարգսյանի անվան Համազգային թատրոնը, Արտաշատի Ամո Խարազյանի անվան պետական դրամատիկական թատրոնը, Վանաձորի Հովհաննես Աբելյանի անվան պետական դրամատիկական թատրոնը, Գյումրու Վ. Աճեմյանի անվան պետական դրամատիկական թատրոնը, Գորիսի Վաղարշյանի անվան պետական դրամատիկական թատրոնը։
Բրեգովիչի ամանորյա հոնորարը քաղաքապետարանում համեմատում են հայ աստղերի հոնորարների հետ
Նշված ժամանակահատվածում այս թատրոններում ոչ միայն մանկական, այլև խաղացանկային ներկայացումներ կցուցադրվեն։
Թանգարանների մուտքավճարները, ինչպես նաև ներկայացումների տոմսերի արժեքները կմնան անփոփոխ։
«Պատմության մեջ առաջին անգամ». Փաշինյանի ամանորյա ուղերձը տարբերվող է լինելու
