ԵՐԵՎԱՆ, 18 դեկտեմբերի — Sputnik. Հայ ջութակահարները լուրջ մրցակից են հրեա ջութակահարներին` մանավանդ Եվրոպայում և ԱՄՆ–ում։ Sputnik Արմենիա մուլտիմեդիոն մամուլի կենտրոնում նման կարծիքի հայտնեց Spring Music Academy փառատոնի հիմնադիր, ալտահար Մաքսիմ Նովիկովը։
Հայ անվանի ջութակահարները` լեգենդար երաժշտական մանկավարժ, ջութակահար Պետրոս Հայկազյանի աշակերտները, մեկ գաղափարի շուրջ են համախմբվել. Հայկազյանի հիշատակին նվիրված համերգաշար կանցկացվի։ Համերգին կմասնակցի կամերային նվագախումբը` Ալ. Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար Կոնստանտին Օրբելյանի ղեկավարությամբ։
«Հույս ունեմ, որ Երևանում շատերը վաղը գալու են կամերային երաժշտության տուն` համերգի։ Հանդիսատեսի համար անակնկալ է լինելու` համերգային ծրագրում կհնչի Լերա Աուերբախի «Երկխոսություններ Ստաբատ մատերի շուրջ» ստեղծագործությունը։ Այն ոչ միայն հայաստանյան, այլ ԱՊՀ երկրների համար է պրեմիերա»,–ասաց Նովիկովը. նա էլ որպես մենակատար է հանդես գալու համերգի ժամանակ։
Նովիկովի խոսքով` լավ է, որ մարդը ցանկացած տարիքում հիշում է, թե ով է իրեն դասավանդել։ Բացի այդ գերագույն հաճույք է նվագել Օրբելյանի ղեկավարությամբ։
Ալմազյան. «Եթե ինձ դիմեին, որ Բրեգովիչին հրավիրեի, երևի ավելի էժան կլիներ»
Ջութակահար և պրոդյուսեր Խաչատուր Ալմազյանը, ում մտահղացմամբ էլ կյանքի է կոչվելու համերգը, հայտնեց, որ Հայկազյանի աշակերտների թվում են ջութակահարներ Սերգեյ Խաչատրյանը, Դիանա Ադամյանը. մեծ բանակ կա երաժիշտների, որոնք հայտնի են ամբողջ աշխարհում:
«Մենք ուզում ենք միավորել նրա աշակերտներին։ Դեկտեմբերի 19-ին Կամերային երաժշտության ազգային կենտրոնում տեղի կունենա առաջին համերգը, որը նաև կունենա շարունակություն»,-ասաց Ալմազյանը։
Նա հայտնեց նաև, որ համերգի համար հրավիրատոմսեր չեն լինելու: Նրա խոսքով՝ Երևանում վճարում են ամեն ինչի համար, իսկ երբ հարցը համերգներին է վերաբերում, ապա փորձում են հրավիրատոմսով մասնակցել:
Կոնստանտին Օրբելյանն էլ անկեղծացավ` Պետրոս Հայկազյանի հետ, ճիշտ է, շատ մտերիմ չի եղել, սակայն հասցրել է շփվել: «Հայկազյանի հետ քիչ եմ շփվել, երբ սովորում էի Երևանի պետական կոնսերվատորիայում։ Դա այնքան վաղուց էր... Սակայն ինձ համար կրկնակի երջանկություն է մասնակցել համերգի, որը նվիրված է սիրելի մանկավարժի, սիրելի մարդու, իր գործի գիտունի»,–ասաց նա։
Օրբելյանը նշեց, որ շատ ուրախ է աշխատել կամերային նվագախմբի հետ, քանի որ դեռ 2006–ին համագործակցության հաջող փորձ են ունեցել։
Հիշեցնենք, որ Պետրոս Հայկազյանը 1950–ից մինչև կյանքի վերջին օրերը դասավանդել է Երևանի Սայաթ Նովայի անվան երաժշտական դպրոցում: Եղել է դպրոցի ուսմասվար, իսկ 1967-2003 թվականներին՝ տնօրեն:
Հայ հանդիսատեսը կվայելի վիրտուոզ ջութակահարի ելույթը. նախագահը հյուրընկալել է Վենգերովին
Հայկազյանը Երևանի Պ. Չայկովսկու անվան երաժշտական միջնակարգ մասնագիտական դպրոցում և Սայաթ Նովայի անվան երաժշտական դպրոցի՝ իր ղեկավարած ջութակի դասարանում կրթել և դաստիարակել է տասնյակ ջութակահարների:
Անվանի մանկավարժը մահացել է 2018–ին։
