ԵՐԵՎԱՆ, 8 օգոստոսի — Sputnik. Հայաստան առաքվող իրանական գազի մատակարարման ծավալները սեպտեմբերից կնվազեն։ Ինչպես հայտնում է Tehrantimes.com-ը, այս մասին հայտարարել է Իրանի նավթային արդյունաբերության նախարարի տեղակալ Համիդրեզա Արաքին։
Նրա խոսքով` Հայաստանին ավելի մեծ ծավալով գազ է պետք, սակայն պայմանագրով որոշակի ծավալ է նախատեսված։
«Մենք ընդունեցինք նրանց առաջարկը և ավելացրինք գազի արտահանումը։ Սակայն մյուս ամիսը կնվազեցնենք ծավալը, քանի որ պայմանագրում որոշակի ծավալ է նախատեսված»,- ասել է նա։
Ավելի վաղ Հայաստանի էներգետիկայի և բնական պաշարների նախարար Լևոն Յոլյանը հայտարարել էր, որ առաջիկայում Հայաստանի կառավարության որոշմամբ կստեղծվի «Էներգաիմպեքս» ՓԲԸ-ն, որը կզբաղվի Իրանից բնական գազի ներկրման ընդլայնման հարցերով։
Հայաստանը բնական գազ է ստանում Ռուսաստանից Վրաստանի տարածքով, իսկ Իրան-Հայաստան գազամուղով մատակարարվող «կապույտ վառելիքը» վերամշակվում է էլեկտրաէներգիայի և հետ ուղարկվում Իրան։
Հայաստանում պաշարների բազան ընդլայնելու համար 2007թ-ին բացվել է Իրան-Հայաստան գազատարը։ Երկու երկրների միջև համաձայնագրի համաձայն` 20 տարվա ընթացքում Իրանը Հայաստան կմատակարարի 36 մլրդ խմ բնական գազ` պայմանագրի գործողության ժամկետը 5 տարով երկարացնելու և գազի առաքումների ընդհանուր ծավալը մինչև 47 մլրդ խմ ավելացնելու հնարավորությամբ։
