ԵՐԵՎԱՆ, 12 սեպտեմբերի — Sputnik. Ավելի քան մեկ տարի առաջ, նշանակումից մեկ տարի անց՝ 2015-ի հուլիսի 27-ին, վարչապետ Հովիկ Աբրահամյանի գլխավորած Հակակոռուպցիոն խորհուրդը գումարեց առաջին նիստը: Նույն օրը հայտնի դարձավ, որ ԱՄՆ Միջազգային զարգացման գործակալությունը (ՄԶԳ) 750 հազար դոլարի դրամաշնորհ է տրամադրում Հայաստանին՝ 2015-2018 թթ. կոռուպցիայի դեմ պայքարելու համար:
Եվս մեկ տարի անց` 2016թ-ի մայիսի 12-ին, Հակակոռուպցիոն խորհրդի հերթական նիստում Հովիկ Աբրահամյանը հիշեցրեց, որ կառավարությունը պայքարում է կոռուպցիայի դեմ, և հայտարարեց, որ դրան զուգահեռ պետք է նաև կրճատի ծախսերը:
Եվս 4 ամիս անց վարչապետը հրաժարական ներկայացրեց: Իսկ թե ինչ արդյունք ունեցավ կոռուպցիայի դեմ ավելի քան մեկ տարի շարունակ մղված պայքարը, հանրությանը պաշտոնապես չներկայացվեց:
Հայաստանի Գործատուների հանրապետական միության նախագահ Գագիկ Մակարյանը Sputnik Արմենիայի հետ զրույցում կարծիք հայտնեց, որ նշված ժամանակահատվածում որևէ փոփոխություն տեղի չի ունեցել։
«Իմ կարծիքով` տասնյակ մարդիկ` տարբեր գյուղապետներ, քաղաքապետներ, մարզպետներ, նախարարներ, պատգամավորներ, ովքեր սերտաճած են իշխանություններին, պարզապես նստած են մարդկանց շալակին, և նրանք պետք է ցած իջնեն, այդ բեռը պետք է վերանա, մարդիկ պետք է տնտեսական և հոգեբանական առումով ազատություն զգան, որովհետև այդ մարդիկ նաև սարդի նման շատ կաշկանդում են տնտեսության զարգացումը համայնքներում»,- ասաց Մակարյանը:
Նրա խոսքով` այս մարդիկ մենաշնորհային կարգավիճակով օգտվում են պետական դոտացիաներից, ինչի հետևանքով խորանում է սոցիալական բևեռացումը, ակտիվանում է կոնֆլիկտը աղքատի և ունևորի միջև:
«Ոչ ֆորմալ տնտեսությունը բացարձակապես չի նվազել, մնացել է շատ բարձր մակարդակի վրա՝ ՀՆԱ-ի մեջ մոտ 50%, աշխատուժի մեջ որոշ ոլորտներում 60-80 % ստվերայնություն: Այսինքն՝ մենք ունենք ոչ ֆորմալ տնտեսության բարձր մակարդակ, որը նշանակում է, որ գումարների ինչ-որ հատվածը գնում է որոշ մարդկանց գրպանը, որոնց տեղերը բոլորն էլ գիտեն, բայց նրանց ձեռք չեն տալիս, չեն խանգարում»,-ասաց նա:
Ի դեպ, Մակարյանը նաև որոշ հաշվարկ է արել, թե քանի մեծ ու փոքր պաշտոնյա պետք է պաշտոնանկ արվի, որպեսզի Հայաստանում ի վերջո զգացվի կոռուպցիայի դեմ պայքարի արդյունքը: Այն է. 100 պաշտոնյա՝ առնվազն 50 գյուղապետ, 10 քաղաքապետ, 4 մարզպետ, 5 նախարար և այլն: Առաջիկա 1 շաբաթվա ընթացքում առնվազն այս թվով պաշտոնյաներ պետք է ազատվեն աշխատանքից, որպեսզի հասարակությունը զգա պայքարի արդյունքը: Միայն այս դեպքում, ըստ Մակարյանի, ժողովրդի մեջ լավատեսական տրամադրություններ, կառաջանան, իսկ տնտեսությունը շունչ կառնի ու կսկսի զարգանալ:
