ԵՐԵՎԱՆ, 16 նոյեմբերի — Sputnik, Նելլի Դանիելյան. Թե որքան գումար կտնտեսի ՀՀ պետական բյուջեն վարչապետ Կարեն Կարապետյանի կողմից ոչ արդյունավետ ՊՈԱԿ-ները լուծարելու արդյունքում, առայժմ հայտնի չէ: Հայտնի չէ նաև, թե քանի մարդ այս կրճատումների հետևանքով առանց աշխատանքի կմնա:
Լրագրողների հետ զրույցում ՀՀ ֆինանսների նախարար Վարդան Արամյանը հայտնեց, որ այս տեղեկատվությունը նոր է հավաքագրվում ու մշակվում:
Բայց ֆինանսների նախարարության ենթակայության տակ գտնվող ՊՈԱԿ-ների լուծարումից, ըստ նախարարի, կտնտեսվի 150-200 մլն դրամ, աշխատանքը կկորցնի շուրջ 50 մարդ:
«Մարդկանց կրճատելը շատ բարդ բան է, որովհետև մենք շատ լավ գիտակցում ենք, որ այդ մարդիկ ընտանիք ունեն: Բայց երկու երնեկ մի տեղ չի լինում: Հնարավոր չէ ունենալ արդյունավետ տնտեսություն, արդյունավետ տնտեսական, ծախսային քաղաքականություն՝ առանց ցավոտ քայլերի: Պետք է որոշակի քայլեր անել, որոնք կլինեն ցավոտ, բայց կարևոր»,- ասաց նախարարը:
Իսկ կարևորն, ըստ Վարդան Արամյանի, այն է, որ հարկատուից վերցված գումարը ծախսվի արդյունավետ:
«Եթե մարդը նստած իր աթոռին ստանում է եկամուտ ու ոչ մի արժեք դրա դիմաց չի ստեղծում, ես՝ որպես ֆինանսների նախարար, դրա նկատմամբ անտարբեր չպետք է լինեմ»,-ասաց նա:
Արամյանը խոստովանում է, որ իր համար հեշտ չէ հանդիպել այդ ՊՈԱԿ-ների կոլեկտիվների հետ, նայել մարդկանց աչքերին ու նման որոշում կայացնել:
«Ես ներողություն եմ խնդրում փողոցում հայտնված բոլոր այն մարդկանցից, որոնց մենք ստիպված ենք ազատել աշխատանքից: Բայց խնդրում եմ ըմբռնումով մոտենալ, որովհետև մենք որևէ անձնական բան չունենք նրանց դեմ»,- ասաց նախարարը:
ՊՈԱԿ-ները լուծարելու և դրանց գործունեությունը դադարեցնելու միանգամից 3 հարց է ընդգրկված կառավարության առաջիկա նիստի օրակարգում:
Այդ նախագծերի համաձայն` առաջիկա օրերին կդադարեցվի նախկին քաղաքաշինության նախարարության կազմում գործող «Քաղաքաշինական ծրագրերի իրականացման գրասենյակ» և ֆինանսների նախարարության «Գնագոյացման վերլուծական ինֆորմացիոն կենտրոն» ՊՈԱԿ-ների գործունեությունը: Իսկ տնտեսական զարգացման և ներդրումների նախարարության «Էկոնոմիկա հանդես» ՓԲԸ-ն կլուծարվի:
«Էկոնոմիկա հանդեսը» 12 աշխատակից ունի, պետական բյուջեից տարեկան 99 312 500 դրամ ֆինանսավորում է ստանում: Ֆինանսների նախարարության «Գնագոյացման վերլուծական ինֆորմացիոն կենտրոն» ՊՈԱԿ-ը 36 աշխատակից ունի, բյուջեից տարեկան հատկացումը 80 315 300 դրամ է: Ֆինանսների նախարարությունն առաջարկում է ՊՈԱԿ-ի փոխարեն ստեղծել «Գների ուսումնասիրության և վերլուծության գործակալություն»՝ 15 հաստիքով և տարեկան 30 մլն ՀՀ դրամ բյուջեով:
Իսկ թե քանի մարդ գործազուրկ կմնա և որքան գումար կխնայվի «Քաղաքաշինական ծրագրերի իրականացման գրասենյակի» լուծարման արդյունքում, հայտնի չէ, քանի որ այս գրասենյակի ֆինանսավորման մասին տեղեկություններ չկան ո՛չ որոշման նախագծում, ո՛չ կառավարության պաշտոնական կայքի «ՊՈԱԿ-ների ֆինանսավորում» բաժնում:
