ԵՐԵՎԱՆ, 24 դեկտեմբերի — Sputnik. ՀՀ գյուղատնտեսության նախարար Իգնատի Առաքելյանն, այսօր, տարվա իր ամփոփիչ ասուլիսի ժամանակ ասաց, որ այս տարի վատ բնակլիմայական պայմաններն իրենց ազդեցությունն են թողել բերքի վրա: Պատասխանելով լրագրողների հարցին՝ թե ֆինանսների նախարար Վարդան Արամյանն ասել է, որ գյուղատնտեսության ոլորտի ցուցանիշներն իրականության հետ կապ չունեն, Իգնատի Առաքելյանն ասաց, «Տարվա ընթացքում եղել է ցրտահարություն, կարկտահարություն, ինչի հետևանքով բերքը նվազել է:
Ըստ Իգնատի Առաքելյանի՝ գյուղատնտեսության ոլորտն անկանխատեսելի է և հնարավոր չէ իմանալ, թե ինչ կլինի հաջորդ տարի: Օրինակ, եթե այս տարվա ցուրտ ձմռանը խաղողի այգիները թաղված չլինեն, ապա մյուս տարվա խաղողի բերքի վրա դա խիստ վատ կանդրադառնա: Մի քանի տարի առաջ ևս նման խնդիր եղել է:
«Եթե բարենպաստ լինեն բնակլիմայական պայմանները, և բերքատվությունը բարձրանա, ապա դա իմ աշխատանքի արդյունքը չի: Եթե մենք կունենանք աճ, այդ աճը չի նշանակում, որ ես իմ աշխատանքը լավ եմ կատարել, եթե ցուրտ տարի է եղել, անկում է գրանցվել, դա էլ չի նշանակում, որ ես վատ եմ աշխատել: Իմ աշխատանքի արդյունքը կհամարեմ այն, որ գյուղատնտեսությունն ունենա աշխատելու միջոցներ»,-ասաց գյուղատնտեսության նախարարը:
Անդրադառնալով գյուղնախարարի պաշտոնը ստանձնելու առաջարկին՝ Իգնատի Առաքելյանը նշեց, որ այդ առաջարկն իր համար անսպասելի, բայց հաճելի էր: Հարցին, թե ինչո՞ւ է համալրել իշխող ՀՀԿ-ի շարքերը, նա պատասխանեց, որ կյանքում ամեն ինչ չէ, որ ծրագրվածի համաձայն է լինում:
«Լինում են նաեւ անսպասելի բաներ, եւ ոչ միշտ տհաճ: Ինչ վերաբերում է որպես նախարար իմ աշխատանքին՝ եթե գոհ կլինեն, կշարունակեմ աշխատել, եթե ոչ՝ չեմ շարունակի»,-ամփոփեց նախարարը:
Նյութի ռուսերեն տարբերակը
