09:29 28 հունիսի 2017
Ուղիղ եթեր
Կառավարություն

Կառավարությունն այլևս նկարչությամբ չի զբաղվում

© Sputnik/ Asatur Yesayants
Տնտեսություն
Ստանալ կարճ հղումը
34 0 0

Կառավարությունն այլևս տնտեսական աճ չի նկարում, 2016թ-ն էլ կավարտվի տխուր, բայց իրական թվերով: Գործատուների հանրապետական միության նախագահ Գագիկ Մակարյանն այսպես է վերլուծում 2016թ-ի տնտեսական ցուցանիշները:

ԵՐԵՎԱՆ, 31 դեկտեմբերի — Sputnik. 2016թ-ը կավարտվի տխուր, բայց իրական թվերով, սակայն թե՛ ժողովրդի և թե՛ բիզնեսի կյանքում այդ թվերը որևէ փոփոխություն չեն բերի: Sputnik Արմենիայի հետ զրույցում, ներկայացնելով 2016թ-ի տնտեսական պատկերը, նշեց ՀՀ Գործատուների հանրապետական միության նախագահ Գագիկ Մակարյանը:

«Եթե նախկինում թվերն ուռճացվում էին՝ սկսած համայնքներից մինչև նախարարություններ, ու վիճակագրության միջոցով ներկայացվում էր 3-4 % տնտեսական աճ, ապա հիմա տրամադրությունները փոխվել են: Կառավարությունում հակված են իրական թվեր ցույց տալ»,- ասաց Մակարյանը:

Նրա համոզմամբ` այս գործելաոճն առաջին հեթին ձեռնտու է հենց կառավարությանը, որը շահագրգռված է ճիշտ իրավիճակ ֆիքսել, որպեսզի մեկ տարի անց կարողանա ցույց տալ, թե իրականում որտեղ ինչ ձեռքբերում է ունեցել:

Կառավարությունն էլ արդեն չի թաքցնում, որ իր նախորդներն իրականում ավելի լավ նկարում էին, քան տնտեսություն վարում: Մասնավորապես՝ եթե 2016թ-ի բոլոր ամիսներին գյուղնախարարի նկարչության շնորհիվ միայն աճ էր գրանցվում, ապա նախարարի փոփոխությունից հետո հենց առաջին ամսում՝ սեպտեմբերին, գրանցվեց 20%, հոկտեմբերին՝ 40%-անոց անկում: Արդյունքում միայն այս ցուցանիշների պատճառով 2016թ-ին տնտեսական աճը մնաց զրոյական մակարդակի վրա:

Гагик Макарян
Photolure
Գագիկ Մակարյան

Չնայած դրան, Գագիկ Մակարյանը որոշակի հույս է կապում տարվա վերջին ամսվա հետ: Քանի որ դեկտեմբերին Հայաստանում նախատոնական առևտուրը մեծ աշխուժություն ու շրջանառություն է ապահովում, Գագիկ Մակարյանը չի բացառում, որ դրա շնորհիվ տնտեսական աճը կարող է հասնել գոնե 1%-ի:

Ինչ վերաբերում է 2017թ-ին, այստեղ ճիշտ հակառակն է: Տարվա առաջին ամիսներին հայաստանյան տնտեսությունը դեռևս թմբիրի վիճակում կլինի: Եթե հետտոնական պասիվությանն ավելացնենք նաև նախընտրական տրամադրությունները, ապա պարզ կդառնա, որ առնվազն մինչև մայիս Հայաստանում տնտեսական տեղաշարժեր չեն լինի:

«Փոփոխություններ չեն լինի հատկապես մարտ-մայիս ամիսներին, երբ ընտրությունների նախապատրաստություններն ավելի կուժեղանան, հետո նաև՝ ընտրություններ ու նոր կառավարության ձևավորում, այդ պատճառով մինչև մայիս մեզ մոտ պասիվ շրջան կլինի»,- ասաց Մակարյանը` նշելով, որ շատ գործատուներ զգուշավոր են լինում, փողեր չեն փոխանցում, անհանգստանում են, թե կստուգեն՝ ուր փոխանցվեց, ում համար, որովհետև երբեմն մտավախություն կա, որ ինչ-որ կուսակցության համար են փոխանցում:

Ընտրությունների ավարտից հետո միայն, երբ կձևավորվի նոր կառավարությունը կամ պարզ կդառնա, թե ում է վստահվելու նաև ՀՀ տնտեսությունը, գործարար հատվածն առավել վստահ սկսի աշխատել:

Իսկ ընդհանուր առմամբ, Գագիկ Մակարյանը լավատես է և հուսով, որ 2017թ-ին տնտեսական աճն ավելին կլինի, քան 2016-ին:

Նյութի ռուսերեն տարբերակը

Գլխավոր թեմաներ