ԵՐԵՎԱՆ, 3 փետրվարի — Sputnik. Վարչապետի գլխավորած պատվիրակության Գյումրի այցի շրջանակներում պարզ դարձավ, որ Գյումրու պատմական հատվածի` «Կումայրի» պատմաճարտարապետական արգելոցի վերականգման ուղղությամբ կիրականացվեն ներդրումային ծրագրեր։
Քանի որ Կումայրին վերականգնելու համար պահանջվում է 200 միլիոն դոլարի ներդրում, ապա այն կիրականացվի փուլային տարբերակով։ Ծրագրերի մեկնարկը կազդարարվի Գյումրու Ռուսթավելի և Շիրազի փողոցների վերականգմամբ։
Ներդրումները Գյումրի ուղղորդելու ՀՀ վարչապետի առաջարկով, այսօր Գյումրի են այցելել 22 գործարար և ներդրող։ Վարչապետի գլխավորած պատվիրակության այցը սկսվեց Գյումրու «Շիրակ» օդանավակայանից։ Գյումրու զարգացումը սերտորեն կապված է «Շիրակ» օդանավակայանի հետ։ Այդ նպատակով Կումայրի արգելոցի վերականգման ծրագրից բացի, իրականացվում է նաև «Շիրակ» օդանավակայանի վերակառուցման ներդրումային ծրագիրը։ Մոտ 10 միլիոն դոլար արժողությամբ ծրագիրը իրականացնել համաձյանել է արգենտինացի ներդրողը։ Օդանավակայանում ներդրողի ներկայացուցիչը վարչապետին ներկայացրեց այն բոլոր փոփոխությունները, որ նախատեսում է իրականացնել «Շիրակ» օդանավակայանում։
Լրագրողների այն հարցին, թե արդյո՞ք իրատեսական է ներդրումային այդ ծրագիրը, արգենտինացի ներկայացուցիչը վստահեցրեց, որ իրենց հայտարարած բոլոր ծրագրերը իրականություն են դառնում։
Օդանավակայանից Կարեն Կարապետյանը` պատվիրակության հետ միասին, այցելեց Գյումրու ածիկի գործարան, ապա եղավ «Լոֆթ» ժամանցի կենտրում։ Բարձրաստիճան հյուրերը հետո ոտքով շարժվեցին դեպի «Կումայրի» արգելոց, շրջեցին Շիրազի և Ռուսթավելի փողոցներում, Աբովյան ճեմափողոցում։
