ԵՐԵՎԱՆ, 23 փետրվարի — Sputnik. Տնտեսական զարգացման և ներդրումների նախարար Սուրեն Կարայանը կառավարության քննարկմանը ներկայացրեց 8 ներդրումային ծրագիր, որոնց հանրագումարը 7 միլիարդ դրամ է։
«Արդյունքում կստեղծվի 350 նոր աշխատատեղ։ Ներդրումային ծրագրերը տարբեր ոլորտներում են` սկսած արևային մարտկոցների արտադրությունից, էներգետիկայի ոլորտից, մինչև գինեգործություն, այգեգործություն ու դեղագործություն»,-ասաց նախարարը։
Կառավարության նիստից հետո Սուրեն Կարայանը լրագրողների հետ զրույցում ասաց, որ նախորդ տարվա հունվարի նկատմամբ արձանագրվել է արտահանման 35 տոկոս աճ։ Կա նաև արդյունաբերության 12 տոկոսանոց աճ։
«Այն նախադրյալները, որ ստեղծում էինք, հիմա թվերով այդ ցուցանիշներն արտահայտվում են։ Միջինում 20-30 տոկոս տարեկան կտրվածքով արտահանման աճ կարձանագրենք։ Այն 3.2 տոկոս տնտեսական աճը, որ դրել ենք պետական բյուջեի հիմքում, կապահովվի»,-ասաց նախարարը։
Բայց, նրա խոսքով, բնակլիմայական պայմանները ևս պետք է նպաստավոր լինեն, որովհետև տնտեսության աճի վրա ազդում է գյուղատնտեսության ոլորտը։
Հարցուպատասխանի վերջում նախարարը հավաստիացրեց` նախընտրական իրավիճակները ներդրողների համար խոչընդոտ չեն։