ԵՐԵՎԱՆ, մայիսի 11 — Sputnik. Պետեկամուտների կոմիտեն վերջին 4 ամսում հասել է նրան, որ խոշոր հարկ վճարողների մոտ ստվերը նվազել է` 48.8 տոկոսից հասնելով 33.2 տոկոսի։ Այս մասին լրագրողներին ասաց ՊԵԿ նախագահ Վարդան Հարությունյանը։
Նրա խոսքով` 2016 թվականի հոկտեմբերից մինչև 2017 թվականի ապրիլն ընկած ժամանակահատվածում ՊԵԿ-ը ապահովել է 653.8 միլիարդ դրամ հարկային եկամուտ
«Նախորդ տարվա նույն ժամանակաշրջանի համեմատ պետական բյուջեի եկամուտների աճը կազմել է 46.1 միլիարդ դրամ կամ 7.6 տոկոս: 500.3 միլիարդ դրամն ապահովվել է հարկային մարմինների, իսկ 153.5 միլիարդը՝ մաքսային մարմինների կողմից: Հարկային մասով աճը կազմել է 43.1 միլիարդ դրամ կամ 9.4 տոկոս, իսկ մաքսային մասով՝ 3 միլիարդ դրամ կամ 1.9 տոկոս»,- ասաց Հարությունյանը:
Նա նշեց, որ 2017 թվականի ապրիլին ՊԵԿ-ը հասել է հարկային հավաքագրումների 107,357 միլիոն դրամ ռեկորդային ցուցանիշի, միաժամանակ նվազել է հարկատուների ստուգումների քանակը։ 2016 թվականի մարտից մինչև այս տարվա մարտն ընկած ժամանակահատվածում իրականացվել է 3588 ստուգում` նախորդ տարվա 9090 ստուգման դիմաց։