ԵՐԵՎԱՆ, 11 հոկտեմբերի — Sputnik. 2017թ-ին Հայաստանում ոչ թե 2.9%, այլ 3.5% տնտեսական աճ է կանխատեսվում։ Արժույթի միջազգային հիմնադրամը բարելավել է Հայաստանի վերաբերյալ նախկինում արած կանխատեսումը։
Կանխատեսումների համաձայն` 2016թ-ին Հայաստանում արձանագրված 1.4%-անոց անկումն այս տարի կփոխարինվի 3.5%-անոց աճով։
Այս կանխատեսմամբ Հայաստանը նախկին խորհրդային հանրապետություններից զիջում է Վրաստանից (4%), Մոլդովայից (4%), Տաջիկստանից (6.5%), Թուրքմենստանից (6.5%) և Ուզբեկստանից (6%)։
ՌԴ-ում ԱՄՀ-ն կանխատեսում է 1,8, Բելառուսում` 0,7%, Ղազախստանում` 3,3, Ղրղըզստանում` 3,5, Ուկրաինայում` 2%-անոց տնտեսական աճ։
Նախկին ԽՍՀՄ երկրներից միայն Ադրբեջանի նկատմամբ է, որ ԱՄՀ մասնագետները բացասական կանխատեսում են արել։ Այդ երկրում 2017թ-ին կանխատեսվում է 1%-անոց անկում։
ԱՄՀ զեկույցում նշվում է, որ կանխատեսումների համար հիմք է ծառայել համաշխարհային տնտեսության ակտիվացման միտումը, որը 2016-ին գրանցված համաշխարհային ֆինանսական ճգնաժամից հետո նախապես գնահատվել էր 3.2%, սակայն ավելի ուշ վերանայվել էր` հասցվելով 3,6%-ի։
2018թ-ին կանխատեսվում է արդեն 3,7% համաշխարհային տնտեսության ակտիվացում։
Հայաստանի համար, սակայն, հաջորդ տարվա ցուցանիշն այս զեկույցում չի վերանայվել։ Այն մնացել է 2,9%-ի սահմաններում։
Հիշեցնենք, որ 2017թ-ի բյուջեի նախագծով Հայաստանի տնտեսական աճը նախատեսված է 3.2%։
