ԵՐԵՎԱՆ, 21 նոյեմբերի — Sputnik. Ռուսաստանը Հայաստանի կարևորագույն առևտրատնտեսական գործընկերն է, իսկ ռուսական ներդրումների ծավալը հայկական բիզնեսում գերազանցում է 3 մլրդ դոլարը, ասաց ՀՀ արտգործնախարար Էդվարդ Նալբանդյանը «Ռուսաստան և Հայաստան. դարերով կոփված բարեկամություն» ցուցահանդեսի բացման ժամանակ։
«Ռուսաստան և Հայաստան. դարերով կոփված բարեկամություն» ցուցահանդեսն այսօր բացվել է Հայաստանի ազգային պատկերասրահում Հայաստանի և Ռուսաստանի արտգործնախարարներ Էդվարդ Նալբանդյանի և Սերգեյ Լավրովի մասնակցությամբ։ Պատմավավերագրական ցուցահանդեսը նվիրված է Հայաստանի և Ռուսաստանի միջև դիվանագիտական հարաբերությունների հաստատման 25-ամյակին։
Նալբանդյանի խոսքով` հայ-ռուսական ռազմավարական դաշնակցային գործընկերությունն ամենահաջողվածն ու արդյունավետն է հետխորհրդային տարածքում։
«Հայաստանում ավելի քան 2000 ձեռնարկություն է գործում ռուսական կապիտալով, զարգացնում ենք համագործակցությունը էներգետիկայի ոլորտում, այդ թվում` միջուկային, տրանսպորտի, հանքարդյունաբերական, նորարարական տեխնոլոգիաների և մի շարք այլ ոլորտներում», – նշեց Հայաստանի արտաքին քաղաքական գերատեսչության ղեկավարը։
Նա ավելացրեց, որ մեր ժողովուրդներին մի շարք խորը բարեկամական զգացողություններ են կապում, որոնք բոլոր ժամանակներում մեր հարաբերությունների մեջ որոշիչ են եղել։ Հենց սա է կազմում այն ամուր հիմքը, որի վրա կառուցվում են Հայաստանի և Ռուսաստանի բազմակողմանի հարաբերությունները։
Նալբանդյանի խոսքով` հայերը Ռուսաստանում ապրում են սկսած XI դարից, բոլորիս են հայտնի Հայաստանի և Ռուսաստանի ականավոր որդիների անունները, իսկ բազմադարյա ավանդույթները սերնդեսերունդ են փոխանցվել։
«Մեր հարաբերությունները կանխորոշում են միջպետական միասնական վստահ փոխգործակցության զարգացում բոլոր ուղղություններով։ Դիվանագիտական հարաբերությունների հաստատումը նոր էջ է բացել ժամանակակից պատմության մեջ, որն անցել է ժամանակի փորձությունը», – նշեց ՀՀ ԱԳՆ ղեկավարը։
Նալբանդյանն ավելացրեց, որ վերջին 10 տարիների ընթացքում ավելի քան 100 հանդիպում է տեղի է ունեցել Հայաստանի և Ռուսաստանի ղեկավարների միջև, լուրջ պայմանագրային և իրավական հիմք կա. ստորագրվել է ավելի քան 200 պայմանագիր և համաձայնագիր։ Արդյունավետ համագործակցություն կա քաղաքական գերատեսչությունների միջև, կառուցողական փոխգործակցություն միջազգային հարթակներում, նաև սերտ փոխգործակցություն է հաստատված անվտանգության և ռազմատեխնիկական համագործակցության ոլորտում։
«Տնտեսական համագործակցության երկարատև ծրագիր է ստորագրվել մինչև 2020 թվականը, ինչը վկայում է, որ տնտեսական հարաբերությունները բացառիկ հեռանկարային բնույթ ունեն», – նշեց նախարարը։
Միջոցառումների շրջանակում անցկացվեց նաև հոբելյանական ամսաթվերին նվիրված հայկական նամականիշի մարման արարողությունը։ ԱԳՆ ղեկավարները կտրեցին կարմիր ժապավենը և ողջույնի խոսքից հետո ծանոթացան ներկայացրած փաստաթղթերին և նոր ցուցահանդեսի լուսանկարներին։ Ցուցահանդեսը կտևի նոյեմբերի 22-ից դեկտեմբերի 22-ը։
Ցուցահանդեսի բացմանը ներկա էին նաև Հայաստանի նախագահ Սերժ Սարգսյանն ու Հայաստանում ՌԴ արտակարգ և լիազոր դեսպան Իվան Վոլինկինը։
ՌԴ արտգործնախարար Սերգեյ լավրովը Հայաստանում է գտնվում աշխատանքային երկօրյա այցով։
