ԵՐԵՎԱՆ, 22 փետրվարի — Sputnik. ՀՀ կառավարության հերթական նիստն այսօր, ձևավորված ավանդույթով, մեկնարկեց ՀՀ վարչապետի հանձնարարականներով:
2017թ-ին 2016-ի համեմատ, Կարեն Կարապետյանի խոսքով, հարկային մուտքերն ավելացել են 125 մլրդ դրամով, բայց սա հնարավորությունների սահմանը չէ: Կարեն Կարապետյանը համոզմունք հայտնեց, որ հարկային ստվերի կրճատման տեղ դեռ էլի կա, քանի որ որոշ գործարարներ օրենսդրական բացից և հարկային ոչ հստակ սահմանված արտոնություններից օգտվելով՝ խուսափում են հարկերից:
Ուսումնասիրությունները, ըստ վարչապետի, ցույց են տալիս, որ ստվերի կրճատումը ոչ միայն հարկային, այլև պետական այլ մարմինների դաշտում է, ուստի Կարեն Կարապետյանը հանձնարարեց 7 օրվա ընթացքում ուսումնասիրել և կառավարությանը փոխանցել առաջարկներ իրավական դաշտի կարգավորման վերաբերյալ:
Մեկ այլ հանձնարարականով Կարեն Կարապետյանն անդրադարձավ առողջապահական հաստատությունների քաղաքաշինական նորմերին: Նրա խոսքով, թե՛ նոր կառուցվողները, և թե՛ գործողները վերանորոգելիս հաշվի չեն առնվում ժամանակակից նորմերը:
«Մենք կառուցում ենք հաստատություններ, որոնց ծախսերի տակից դուրս գալն անհնար է՝ ընդհանուր օգտագործման լայն տարածքներ, բարձր առաստաղներ, որոնք տաքացնելն ուղղակի անհնար է»,- ասաց վարչապետը:
Հայաստանում վերջին նորմերն ընդունվել են 1998թ-ին ու այլևս չեն արդիականացվել:
Վարչապետը հանձնարարեց քաղաքաշինության կոմիտեի ղեկավարին 2 ամսվա ընթացքում ուսումնասիրել խնդիրն ու առաջարկել լուծումներ:
