ԵՐԵՎԱՆ, 2 օգոստոսի — Sputnik. Գյուղատնտեսական ժամկետանց վարկերի գծով տույժ ու տուգանքների ներման գործընթացը մեկնարկել է։ Այս մասին այսօր կառավարության նիստից հետո լրագրողների հայտնեց գյուղատնտեսության նախարար Արթուր Խաչատրյանը։ Նա նշեց, որ ներման ենթակա գումարը կազմում է շուրջ 4 մլրդ 230 մլն դրամ։
«Մեկ անգամ ևս հստակեցնենք` խոսքը վերաբերում է միայն տույժ ու տուգանքներին։ Մայր գումարների ու տոկոսադրույքների սպասարկումը պետք է մնա այնպես, ինչպես նախնական պայմանագրով նախատեսված է եղել` կնքված վարկառուի ու բանկի»,– ասաց գյուղնախարարը։
Ի դեպ, նախարարի տեղեկություններով, գյուղացիական վարկերի մեծամասնությունը տրված է եղել մեկ բանկի կողմից։ Թե որի, նախարարը չհստակեցրեց։
«Ագրարագյուղացիական միության» նախագահ Հրաչ Բերբերյանն էլ գյուղացիների այսօրվա վիճակի համար մեղադրում է հենց բանկերին ու նախկին կառավարություններին։
«Կառավարությունը փոխվեց, բայց չփոխվեց ռազմավարությունը` բանկերին էին ֆինանսավորում, ոչ թե գյուղացուն։ Փոխանակ գյուղացին հեկտարի հաշվարկով իր գումարը ստանա և ինքը որոշի, թե այդ գումարով ինչ սերմացու է ձեռք բերում, ինչ դիզվառելիք, ինչ մշակի, կառավարությունն էր որոշում, թե ինչն է սուբսիդավորում, ինչը` ոչ»,– ասաց Բերբերյանը` հավելելով, որ աշխարհում նման պրակտիկա չկա, երբ կառավարությունը գյուղացուն աջակցելու նպատակով սուբսիդավորի բանկերին, որպեսզի վերջիններն էժան վարկեր տան գյուղացուն։
Սխալ կառավարման արդյունքում, Հրաչ Բերբերյանի խոսքով, բանկից ստացված վարկերը մեծ մասամբ նպատակին չեն ծառայել։ «Մարդը հարյուրավոր հեկտարներ հող ուներ, չէր կարողանում մշակել, բայց նա չէր սուբսիդավորվում։ Մյուս կողմից նա կարող էր հողի սեփականության վկայականով դիմեր բանկ, օգտվեր էժան վարկից»,– ասաց նա։
Ի դեպ, «Ագրարագյուղացիական միությունն» աշնանը, Հրաչ Բերբերյանի խոսքով, հանդես կգա «կիսաքաղաքական հայտարարությամբ», որով կհայտնի, թե որ քաղաքական ուժն է հայաստանյան գյուղատնտեսությունը հասցրել ներկայիս օրհասական վիճակին։
