ԵՐԵՎԱՆ, 30 սեպտեմբերի — Sputnik. «Որոշակի գնաճ օգոստոս ամսին եղել է, այժմ էլ առկա է»։ Այս մասին այսօր լրագրողների հետ զրույցում հայտարարեց ՀՀ ԿԲ նախագահ Արթուր Ջավադյանը՝ անդրադառնալով տնտեսական իրավիճակի ռիսկերի հետ կապված հարցին։
Նրա խոսքով` մակրոտնտեսական ցուցանիշների հետ կապված մտավախություններ չկան։
«Մենք նախորդ տարվա մեր հայտարարած թիրախի մեջ ենք ու այդ առումով խնդիր չունենք։ Պետբյուջեի մասին օրենքով նախատեսված է 4 պլյուս, մինուս 1.5 տոկոս գնաճ, որի շրջանակներում մենք կմնանք։ Ավելին՝ կլինենք այդ շեմի ստորին հատվածում»,– հայտարարեց Ջավադյանը։
ԿԲ նախագահը կարծում է, որ եթե պահպանվի այն միջավայրը, որն այժմ առկա է՝ մրցակցությունը շարունակվի, ապա բանկերում վարկերի տոկոսադրույքները կնվազեն։
Կառավարության հաստատած պետբյուջեի նախագիծը Ջավադյանը որակեց իրավիճակին համապատասխան բյուջե և տեղեկացրեց, որ ԿԲ–ն առաջիկայում մանրամասն կհրապարակի իրենց տեսակետը այդ փաստաթղթի մասին։
Պատասխանելով կապիտալի արտահոսքի մասին հարցին՝ Ջավադյանը նշեց, որ խոշոր արտահոսք, որպես այդպիսին, չի եղել։
«Կապիտալի խոշոր արտահոսք ունեցել ենք «թավշյա հեղափոխության» առաջին օրերին, դրանից հետո շրջանառությունը կարգավորվել է»,– ընդգծեց Ջավադյանը ։ Նրա հավաստմամբ` հիմա, ընդհակառակը, ավանդների ծավալը հանրապետությունում ավելացել է ։
