ԵՐԵՎԱՆ, 1 հոկտեմբերի — Sputnik. 2019թ.–ի բյուջեի նախագիծը Նիկոլ Փաշինյանը համարում է իներցիոն։ Այս մասին նա հայտարարեց այսօր ֆեյսբուքյան ուղիղ եթերում։ «Ըստ էության մենք այս նախագիծը ձևավորում ենք նախկինից եկած իներցիայի տրամաբանության շրջանակներում, որովհետև ընդունված է, որ բյուջե հիմնված լինի ոչ թե կանխատեսումների, այլ ավելի շատ այսօրվա իրողությունների վրա»,– ասաց Փաշինյանը` միաժամանակ չբացառելով, որ ընդունվելուց հետո այն կբարելավվի։ Որպես հնարավոր բարելավում Նիկոլ Փաշինյանը չբացառեց բյուջետային աշխատողների աշխատավարձերի բարձրացման հնարավորությունը։
Անդրադառնալով ներկայացված բյուջեի նախագծին` Փաշինյանը նշեց, որ դրանով նախատեսվում է ծառայողական ավտոմեքենաների թվի էական կրճատում, պետական կառավարման համակարգի արդյունավետության բարձրացում։
«Լուրջ բարեփոխումներ են նախատեսվում ոստիկանական համակարգում, ճանապարհային երթևեկության բնագավառում և, ընդհանրապես, բոլոր ասպարեզներում»,– ասաց Փաշինյանը։
Որպես հիմնական նպատակ վարչապետը նախանշեց Հայաստանն արդյունաբերական երկիր դարձնելը, պետական կառավարման արդյունավետությունը բարձրացնելը, արդար տնտեսական համակարգ ստեղծելը։
Հիշեցնենք` սեպտեմբերի 27-ին, ՀՀ կառավարությունը հաստատեց «Բյուջե–2019»–ի նախագիծն ու այն ուղարկեց ԱԺ` հետագա քննարկման ու հաստատման։
