13:52 17 նոյեմբերի 2018
Ուղիղ եթեր
  • USD485.72
  • GBP621.53
  • EUR550.71
  • RUB7.35
Տոնավաճառ, արխիվային լուսանկար

ԵԱՏՄ–ն խստացնում է կանոնները. Հայաստանում հարվածն առաջինը կզգա մանր բիզնեսը. տնտեսագետ

© Sputnik / Asatur Yesayants
Տնտեսություն
Ստանալ կարճ հղումը
71220

Հայաստանում մանր բիզնեսով զբաղվող անձինք հունվարի 1-ից ստիպված կլինեն կրճատել ներկրվող ապրանքի քանակը։

ԵՐԵՎԱՆ, 10 նոյեմբերի — Sputnik, Նելլի Դանիելյան. ԵԱՏՄ–ն խստացնում է երրորդ երկրներից իր անդամ երկրներ առանց մաքսատուրքի ապրանք տեղափոխելու կանոնները։ Նոր կանոնները հաստատվել են ԵԱՏՄ տնտեսական հանձնաժողովում նոյեմբերի 1-ին։

Նոր փաստաթղթի համաձայն` 2019թ–ի հունվարի 1-ից ԵԱՏՄ անդամ երկրների անհատ քաղաքացիները երրորդ երկրներից կկարողանան առանց մաքսատուրք վճարելու առավելագույնը մինչև 500 եվրո արժեքով և 25 կգ–ը չգերազանցող ուղեբեռ ներկրել։

Սահմանված քանակը գերազանցող յուրաքանչյուր ապրանքի դիմաց քաղաքացին ստիպված կլինի ապրանքի գնի 30%–ի չափով մաքսատուրք վճարել։

Անմաքս ներկրման կանոնների կտրուկ խստացումը Ինովացիոն և ինստիտուցիոնալ հետազոտությունների կենտրոնի ղեկավար, տնտեսագետ Ատոմ Մարգարյանը պայմանավորում է Ռուսաստանի նկատմամբ կիրառված տնտեսական պատժամիջոցներով ու դրանց` այդ երկրի վրա արդեն զգացվող հետևանքներով։ Ընդ որում, նրա խոսքով, այս խստացումներով ոչ միայն Ռուսաստանի, այլև ԵԱՏՄ անդամ այլ երկրների համար կարող են հավելյալ մուտքերի հնարավորություն ստեղծել։

«Ինչպես ասում են, դրանք լավ օրից չէ, որ արվում են»,– ասաց տնտեսագետը։

Նա նաև նշեց, որ ԵԱՏՄ–ում գործող կարգերում նախատեսվում էր խստացումներ իրականացնել, բայց ոչ նման կտրուկ ու արագ կերպով։

«Այս նախագիծը կար, բայց ոչ այս դրույքաչափերով։ Նախատեսվում էր ներմուծվող անհատական օգտագործման ապրանքների մաքսատուրքի ստորին շեմը մինչև 500 եվրոյի և 25 կգ–ի սահուն կերպով իջեցնել 3 տարվա ընթացքում, մինչև 2021թ–ը»,– ասաց Մարգարյանը։

Ինչ վերաբերում է Հայաստանին, Մարգարյանի դիտարկմամբ, մեր երկրում այս խստացումներից առավելապես կտուժեն ավտոմեքենաներով, գնացքով կամ ծովային ճանապարհով ապրանք ներմուծող և մանր բիզնեսով զբաղվող քաղաքացիները, որոնք գործող արտոնությունից օգտվելով` փոքր քանակով ապրանք են ներմուծում վերավաճառքի նպատակով։

«Հնարավոր է` որոշակիորեն տուժեն հատկապես Թուրքիայից, Իրանից, Չինաստանի և այլ երկրներից ապրանք ներկրողները, բայց չկա չարիք առանց բարիքի։ Շահում է մեծ հաշվով բյուջեն, և այդ ամենը վերադառնում է հանրությանը` հանրային բարիքների տեսքով»,– ասաց Մարգարյանը։

Հիշեցնենք` մինչ օրս երրորդ երկրներից առանց տուրքերի ներմուծման առավելագույն շեմը 1500 եվրո արժեքով ու 50 կգ քաշով ուղեբեռն էր։

թեգերը:
Եվրասիական Տնտեսական Միություն (ԵԱՏՄ), Հայաստան

Գլխավոր թեմաներ