ԵՐԵՎԱՆ, 4 մարտի — Sputnik. Վերջնական որոշում դեռևս չկա, թե քանի աշխատակից կկրճատվի Տնտեսական զարգացման և ներդրումների նախարարությունից օպտիմալացման արդյունքում: Այս մասին այսօր ԱԺ-ում լրագրողների հետ զրույցում ասաց նախարար Տիգրան Խաչատրյանը:
«Մենք քննարկում ենք, օպտիմալացումը գործընթաց է, պետք է կատարել այնպես, որ գարծառույթները չտուժեն, որակը չտուժի: Իսկ թե որքան հաստիք հնարավոր կլինի դրա արդյունքում կրճատել, ածանցյալ հարց է»,- ասաց նախարարը` հրաժարվելով նույնիսկ մոտավոր թիվ հայտարարել:
Մինչ այդ մամուլում այսօր հայտնվել է ՀՀ փոխվարչապետ Մհեր Գրիգորյանի և ֆինանսների նախարար Ատոմ Ջանջուղազյանի՝ վարչապետ Նիկոլ Փաշինյանին ուղղված նամակը, որով նրանք վարչապետին են ներկայացնում պետական ծառայողների օպտիմալացման հնարավոր պատկերը: Ըստ հրապարակված տեղեկատվության` օպտիմալացման արդյունքում կրճատվելու է 10 000 քաղաքացի:
ՀՀ կառավարությունը նախաձեռնել է օպտիմալացման գործընթաց, որի արդյունքում նախատեսվում է առկա 17 նախարարությունները միավորել և դարձնել 12-ը: Հընթացս օպտիմալացվում են նաև կառավարությանն առընթեր այլ մարմիններ` ՊՈԱԿ-ներ ու ԾԻԳ-եր: