ԵՐԵՎԱՆ, 21 մարտի — Sputnik. Կառավարության աշխատանքի արդյունավետության բարձրացման նպատակով ՀՀ կառավարությունն այսօր որոշում կայացրեց լուծարել ևս երկու պետական ոչ առևտրային կազմակերպություններ` «Գյուղական տարածքների տնտեսական զարգացման ծրագրերի իրականացման գրասենյակն» ու «Գյուղատնտեսության զարգացման հիմնադրամ» պետական հիմնարկը:
Նշենք, որ երկու հիմնարկներն էլ գրեթե նույն նպատակին էին ծառայում. իրականացնում էին պետական բյուջեով և օտարերկրյա պետությունների ու միջազգային վարկատու կազմակերպությունների տրամադրած միջոցներով մշակված ծրագրերը:
Կառավարության որոշմամբ` դրանց լուծարվելուց հետո գործող վարկային և դրամաշնորհային ծրագրերը կիրականացվեն ՀՀ գյուղատնտեսության նախարարության կողմից, որն էլ լուծարվող կառույցների իրավահաջորդն է:
