ԵՐԵՎԱՆ, 9 ապրիլի — Sputnik. Հայաստան ներկրվող մեքենաների թիվը գրեթե մեկուկես անգամ աճել է։ Այս մասին այսօր լրագրողների հետ զրույցում ասաց Արարատի մաքսային տերմինալի պետ Կարեն Բաբայանը։
Երևանի հարավում գտնվող այս տերմինալում մեկ օրվա մեջ 300-310 մեքենա են մաքսազերծում։ Ընդ որում` բեռնվածությունը շատ ավելի է մեծացել։ Եթե 2018 թվականի առաջին եռամսյակում 14 հազար մեքենա է Հայաստան ներկրվել, 2019–ի նույն ամիսներին այդ թիվն արդեն հասնում է 22–23 հազարի։
Երկրի բնակիչներն ուզում են օգտվել Եվրասիական միության «պատուհանից» ու ցածր մաքսային տուրքով մեքենաներ բերել։ ԵԱՏՄ մուտք գործելիս Հայաստանը հնարավորություն է ստացել ժամանակավոր չկիրառել Միության միասնական մաքսատուրքերը մեքենաների համար, այլ պահպանել սեփական տուրքերը հինգ տարվա ընթացքում (2015 թվականի սկզբից մինչև 2019 թվականի վերջը)։
Հայաստանում դեռ մեքենաների տուրքը կազմում է դրանց արժեքի 10%։ 2020 թվականին այն շարժիչի ամեն քառակուսի մետրի դիմաց 0,4 –ից 3,2 եվրո կլինի։ Դա շատ ավելին է ստացվում, քան ներկայիս 10%։
«Քաղաքացիներն ուզում են օգտվել դեռ գործող այդ հնարավորությունից ու նախկինից շատ ավելի շատ մեքենա են ներկրում», – ասաց Բաբայանը։
Այնուամենայնիվ, Հայաստանը մեքենաներն էժան մաքսազերծելու ու Ռուսաստան կամ Ղազախստան տեղափոխելու համար էժան ճանապարհ չէ։ Որովհետև մեքենայի հետ կա ապրանքագիր, որում գրված է` որտեղից է բերվել։ Ու եթե մեքենան տանում են Ալմաթի, Ռոստով կամ Գոմել, ապա մաքսային տուրքերի տարբերությունը տեղում վճարում են։
Նշենք, դեռ 2017 թվականից են սկսել ավելի շատ մեքենա ներկրել Հայաստան։ Եթե 2016 թվականին 17 հազար մեքենայից մի փոքր քիչ են ներկրել, ապա 2017 թվականին` 39 հազար, իսկ 2018 թվականին` ավելի քան 67 հազար մեքենա։ Աճը մասնավորապես գրանցվել է աջակողմյան մեքենաների ներկրման հաշվին, որոնք ուզում էին հասցնել բերել մինչ արգելքը, որը վերջնականապես ուժի մեջ կմտնի 2019 թվականի մայիսի 1–ին։
