10:46 25 հունիսի 2019
Ուղիղ եթեր
  • USD477.81
  • GBP609.64
  • EUR544.32
  • RUB7.60
Արարատյան մաքսակետ

Ավտոմեքենա ներկրողների ու մաքսայինի մշտական վեճը. ասա՝ ինչ արժե մեքենադ, ասեմ` ով ես դու

© Sputnik / Aram Nersesyan
Տնտեսություն
Ստանալ կարճ հղումը
120 0 0

Ավտոմեքենա ներկրողները ՊԵԿ–ին մեղադրում են մաքսազերծման արժեքները ուռճացնելու, մաքսավորներն էլ ներկրողներին մեղադրում են կասկածելի գործարքներ ու մանիպուլյացիոն նոր մեխանիզմներ կիրառելու մեջ։

ԵՐԵՎԱՆ, 7 հունիսի — Sputnik. Մաքսային ծառայությունում քաղաքացիներից ավտոմեքենաների մաքսազերծման բարձր արժեքներ են գանձում։ Այսօր լրատվամիջոցների առջև նման հայտարարությամբ է հանդես եկել իրավապաշտպան Արա Խաչատրյանը` ներկայացնելով իր մի վստահորդի հետ կատարված կոնկրետ դեպքը։

Նրա խոսքով, այդ քաղաքացուց Հայաստան ներկրած ավտոմեքենայի դիմաց մաքսատանը պահանջել են 64 000 դոլար` հաշվի չառնելով ներկրողի ներկայացրած փորձագիտական եզրակացությունն այն մասին, որ ավտոմեքենան վթարված է և վնասի չափը կազմում է 11 000 000 դրամ (շուրջ 23 000 դոլար)։

Արա Խաչատրյանն ու իր վստահորդը մաքսային մարմնից պահանջում են ավտոմեքենայի արժեքից հանել հիշյալ 23 000 դոլարը։ Այդ պահանջով Արա Խաչատրյանն այսօր լրագրողների ուղեկցությամբ այցելել է Արարատյան մաքսատուն, հանդիպել մաքսատան պետի տեղակալ Գեղամ Սարմազյանի հետ ու ներկայացրել իրենց փաստարկները։

Ի դեպ, Արա Խաչատրյանը նշել է նաև, որ իրենց ներկայացրած տեղեկանքները մերժել է մաքսային տեսուչ Նարեկ Գևորգյանը, ում գործողություններում իրենք դիտավորություն են տեսնում։

Խաչատրյանի ներկայացրած փաստարկները լսելուց հետո Գեղամ Սարմազյանը հայտարարել է. «Շատ քաղաքացիներ կան, որ համաձայն չեն լինում հարկային, մաքսային մարմինների գործողություններին ու սահմանված կարգով դիմում են կամ գանգատարկման հանձնաժողով, կամ դատական մարմիններին։ Նույնը կարող եք անել դուք»։ Սարմազյանը վստահեցրել է, որ իրենց համակարգում կոռուպցիա չկա, որևէ աշխատակից կաշառքով գործ չի անում։ Անգամ հիշեցրել է, որ մաքսային ու հարկային մարմինները գտնվում են ինքնամաքրման գործընթացում, ու իրենք շնորհակալ կլինեն, եթե հետևողական քաղաքացիներն օգնեն իրենց բացահայտել համակարգի կոռումպացված աշխատակիցներին։ 

Իրավապաշտպան Արա Խաչատրյանը, սակայն պնդում է, որ ներկայացրած դեպքից բացի իրեն նաև այլ քաղաքացիներ են դիմում` պնդելով, որ ավտոմեքենաների մաքսազերծման համար մաքսայինում իրենցից շատ ավելի բարձր արժեք են պահանջում` հաշվի չառնելով ինվոյսային արժեքի մասին օրենքի պահանջը։

«Կան տասնյակ օրինակներ ու քաղաքացիներ, որոնք տուժած են։ Այս պահին էլ մաքսատան տարածքում գտնվում են 2 քաղաքացի, որոնք, իրենց պատմածով 1 ամիս է գտնվում են Երևանում, բնակարան են վարձել, 1 մլն դրամ գումար են ծախսել, որպեսզի կարողանան 2000 դոլարանոց մեքենա մաքսազերծեն»,– լրագրողների հետ զրույցում ասել է Արա Խաչատրյանը։

Քիչ առաջ Արա Խաչատրյանի հայտարարությանն արձագանքել է ՀՀ ՊԵԿ տեղեկատվության  և հասարակայնության հետ կապերի բաժինը` Արա Խաչատրյանի ներկայացրած դեպքը որակելով «կասկածելի գործարքների շարքից»։

ՊԵԿ–ը հայտարարում է, որ բազմաթիվ քաղաքացիներ ավտոմեքենաների մաքսազերծման մանիպուլյացիայի նոր մեխանիզմ են կիրառում`թաքցնելով աճուրդից ավտոմեքենայի  ձեռքբերման իրական փաստաթղթերը և փոխարենը ներկայացնելով միջնորդ կազմակերպության կողմից տրված հաշիվ-ապրանքագիր, որում արտացոլված ապրանքի գինն էականորեն տարբերվում է ավտոմեքենայի աճուրդում վաճառքի գնից:

«ՊԵԿ-ը, հատուկ ծրագրի միջոցով, նույնականացրել է նրա մատնանշած ավտոմեքենան, որը միջնորդ կազմակերպության կողմից տրված հաշիվ-ապրանքագիրը դուրս գրելուց օրեր առաջ ամերիկյան աճուրդում վաճառվել է 45 000 ԱՄՆ դոլարով: Ինչ վերաբերում է Ա. Խաչատրյանի բարձրաձայնած կոռուպցիոն սխեմաներին, հարկ է նշել, որ ավագ մաքսային տեսուչ Նարեկ Գևորգյանն աչքի է ընկնում բարձր պրոֆեսիոնալիզմով և ակտիվ մասնակցություն ունի նշված մեխանիզմի բացահայտման գործում»,– հայտնում է ՊԵԿ–ը:

Հիշեցնենք` ոլորտում իրականացված փոփոխություններից հետո այսօր ավտոմեքենա ներկրողներին հնարավորություն է տրվում ավտոմեքենա մաքսազերծել ոչ միայն մաքսային մարմնի հաշվարկած արժեքով, այլև`ինվոյսային արժեքով, եթե այն արժանահավատ է։

Իսկ վթարված ավտոմեքենաների դեպքում հիմք է ընդունվում փորձագետի եզրակացությունը։ Այն տրվում է պետության կողմից հատուկ լիցենզավորված  կազմակերպությունների կողմից` 25 000 դրամ վճարի դիմաց` 24 ժամվա ընթացքում։

Ըստ թեմայի

Հայկական ապրանքն ավելի հեշտ Չինաստան կհասնի. նախարար
Երևան էր եկել ՌԴ ավիացիոն մաքսատների ղեկավար անձնակազմը. ի՞նչ է քննարկվել ՊԵԿ-ում
թեգերը:
Հայաստան, Պետական եկամուտների կոմիտե (ՊԵԿ)

Գլխավոր թեմաներ