ԵՐԵՎԱՆ, 15 օգոստոսի - Sputnik. Ամուլսարի առնչությամբ փորձաքննական եզրակացության հրապարակումը սպասված իրադարձություն էր։ Այս մասին ասել է «Լիդիան Ինթերնեյշնլի» նախագահի և գլխավոր գործադիր տնօրենի ժամանակավոր պաշտոնակատար Էդվարդ Սելլերսը` տեղեկանում ենք «Լիդիան Արմենիայի» Facebook-յան էջից։
«ՀՀ կառավարությունը բազմիցս նշել է, որ «Լիդիանը» հնարավորություն կունենա շարունակել Ամուլսարի ծրագրի իրականացումը փորձաքննության արդյունքներից կախված։ Այժմ պետք է ծանոթանանք փորձաքննական եզրակացության ամբողջական տեքստին և վստահենք, որ այն կհաստատի շրջակա միջավայրի պահպանության վերաբերյալ «Լիդիանի» խիստ ուշադիր մոտեցումը»,–ասել է նա։
Սելլերսը հայտնել է նաև՝ ուրախ է տեղեկանալ, որ փորձաքննական եզրակացության հետ կապված՝ «Լիդիանի» նկատմամբ քրեական հետապնդման կամ քրեական գործի վարույթը շարունակելու հիմքեր չկան։
Նրա խոսքով` «Լիդիանը» մշտապես շեշտել է, որ Հայաստանում իր գործունեությունն իրականացնում է շրջակա միջավայրի վրա ազդեցության համապարփակ գնահատման գործընթացի հիման վրա տրված ընդերքօգտագործման թույլտվությունների համաձայն։
«Այդուհանդերձ, անցած տարվա հուլիսից սկսած «Լիդիանի» Ամուլսարի ծրագիրը բնապահպանական երեք աուդիտի է ենթարկվել, և ընկերությունը լիովին համագործակցել է բոլոր փորձաքննական մարմինների հետ»,–հայտնել է նա։
Հիշեցնենք, որ երեկ ՀՀ քննչական կոմիտեն հայտարարել էր, որ Ամուլսարի փորձագիտական եզրակացությունը ստանալուց հետո քննչական խումբը եկել է այն եզրակացության, որ քրեական հետապնդման հիմքեր չկան։
ՀՀ Քննչական կոմիտեի ՀԿԳ կոռուպցիոն և կիբերհանցագործությունների քննության վարչության պետ, Ամուլսարի գործով քննչական խմբի ղեկավար Յուրա Իվանյանը լրագրողների հետ հանդիպման ժամանակ հայտարարել էր, որ գործն, ամենայն հավանականությամբ, կկարճվի։
Որոշում` հօգուտ «Լիդիանի». ըստ դրա ոստիկանությունը տարածքից պետք է հեռացնի ցուցարարներին
