ԵՐԵՎԱՆ, 17 դեկտեմբերի — Sputnik. Հայաստանյան շոու բիզնեսի ներկայացուցիչներից իրենց եկամուտները հայտարարագրել են միայն 10-ը։ Այսօր ՊԵԿ–ում հրավիրված ասուլիսում հայտնեց ՀՀ ՊԵԿ փոխնախագահ Էդուարդ Հովհաննիսյանը։
«Որոշ ներկայացուցիչների նկատմամբ հարուցվել են քրեական գործեր։ Թե քանի գործ է հարուցվել, չեմ ասի»,– ասաց Հովհաննիսյանը։
Ասուլիսի ավարտին, ՊԵԿ նախագահը թեմայի շուրջ որոշ պարզաբանումներ ներկայացրել Sputnik Արմենիայի թղթակցին։ Մասնավորապես ասաց, որ եկամուտների հայտարարագիր ներկայացրած աստղերի շարքում թաքնված միլիոնատերեր չեն բացահայտվել։
«Փոքր թվեր են։ Այդ ոլորտում շատ դժվար է իրական եկամուտները բացահայտելը»,– ասաց Հովհաննիսյանը։
Հատկապես դժվար է վերահսկել ու հիմնավորել Հայաստանից դուրս համերգների դիմաց աստղերի վճարվող գումարների իրական չափերը։
«Իրականում հեշտ չէ։ Ուղղակի մենք սրանով փորձեցինք նրանց բերել հարկային դաշտ, որպեսզի զգոն լինեն, հասկանան, որ, եթե եկամուտ են ստանում, ուրեմն պետք է հարկ վճարեն»,– ասաց նա։
«Անհարմար է, մի՛ արեք նման բաներ». շոու բիզնեսի ներկայացուցիչները վճարո՞ւմ են հարկերը
2018թ.-ի սեպտեմբերին, ՊԵԿ–ը հայտարարել էր, որ Հայաստանում բավական բարձր վարձատրվող երգիչները տասնամյակներ շարունակ հարկային հայտարարագրեր չեն ներկայացրել, հարկեր չեն վճարել, ինչը օրենքի պահանջ է։
Հայտարարագրեր ներկայացնելու վերջնաժամկետ էր սահմանվել 2018թ.–ի սեպտեմբերի վերջը։
Որոնք են Հայաստանի ամենաստվերային ոլորտները. մանրամասնում է ՊԵԿ նախագահը
Բայց 2018թ.-ի դեկտեմբերին ՊԵԿ–ը դարձյալ հայտարարել էր, որ հայտարարագիր ներկայացնող աստղեր չեն եղել։
Հիշեցնենք` օրենքը նախատեսում է, որ շոու բիզնեսի ոլորտում ձեռնարկատիրությամբ զբաղվող երգիչները, երաժիշտները, հանդիսավարներն և այլ ներկայացուցիչներ պետք է պետական գրանցում ստանան, հաշվառվեն հարկային մարմնում, ինքնահայտարարագրեն սեփական եկամուտներն ու հարկեր վճարեն։
