11:59 19 հունվարի 2021
Ուղիղ եթեր
  • USD522.19
  • GBP706.58
  • EUR629.92
  • RUB7.03
Տնտեսություն
Ստանալ կարճ հղումը
110 0 0

ՊԵԿ նախագահը լրագրողների հետ զրույցում պատասխանել է հարցին, թե արդյո՞ք տնտեսությունը կտուժի թուրքական ապրանքների ներմուծման արգելքի պատճառով։

ԵՐԵՎԱՆ, 3 նոյեմբերի — Sputnik. Թուրքական ապրանքների ներմուծման ժամանակավոր արգելքը հարկային եկամուտների և մաքսային վճարների որոշակի նվազեցման կհանգեցնի, սակայն տնտեսության վրա այդ բացասական ազդեցությունը կարճ ժամանակում կվերականգնվի։ Ազգային ժողովում լրագրողների հետ ճեպազրույցում ասաց ՊԵԿ նախագահ Էդվարդ Հովհաննիսյանը` անդրադառնալով կառավարության որոշմանը։

Հոկտեմբերի 20-ին ՀՀ կառավարությունը որոշում էր ընդունել արգելելու թուրքական ծագում ունեցող ապրանքների ներմուծումը։ Որոշումն ուժի մեջ կմտնի 2020 թվականի դեկտեմբերի 31-ից` 6 ամիս ժամկետով։

«Վստահ ենք, որ մեր տնտեսվարողներն ու տնտեսության զարգացման պատասխանատուները կարող են և կձեռնարկեն համապատասխան աշխատանքներ, որպեսզի բիզնեսը կարճ ժամանակում հարմարվի նոր իրավիճակին։ Պետք է հնարավորություն ստեղծվի, որ կարողանան նմանատիպ ապրանքներ ներկրեն այլ երկրներից»,–ասաց Հովհաննիսյանը։

ՊԵԿ նախագահը հայտնեց` պետք է ստեղծվի հնարավորություն, որ Թուրքիայի փոխարեն առաջին հերթին ԵԱՏՄ անդամ երկրներից համապատասխան ապրանքների ներմուծում կատարվի։

Նրա խոսքով`Թուրքիայից ամենաշատը հագուստ և սարքավորումներ են ներկրվում Հայաստան։ Իսկ թե քանի՞ տնտեսվարող է կոնկրետ Թուրքիայից ապրանք ներկրում` Հովհաննիսյանը դժվարացավ պատասխանել այդ հարցին։

Հիշեցնենք, որ սեպտեմբերի 27-ից Արցախի դեմ թուրք–ադրբեջանական ու ահաբեկչական ուժերի սանձազերծած պատերազմի առաջին իսկ օրերից հայաստանյան սպառողներն ու խոշոր առևտրի ցանցերն արշավ սկսեցին թուրքական ապրանքների վաճառքի դեմ։

Ի պատասխան հանրային դժոգհության՝ ՀՀ էկոնոմիկայի նախարարությունը համապատասխան որոշման նախագիծ ներկայացրեց հանրային քննարկման։ Իսկ հոկտեմբերի 20-ին այն արդեն ընդունվեց ՀՀ կառավարության կողմից։

Նշենք, որ 2019 թվականին Թուրքիայից Հայաստանի Հանրապետություն ներմուծումն ըստ ծագման երկրի հատկանիշի կազմել է 268.1 մլն ԱՄՆ դոլար։ Թուրքիայից մեր երկիր հիմնականում ներմուծվում է hագուստ (69.4 մլն դոլար), ցիտրուսային մրգեր (10.3 մլն դոլար), մեքենաներ, սարքավորումներ և մեխանիզմներ` էլեկտրական ջեռուցիչ, սառնարան (35.3 մլն դոլար), նավթ և նավթամթերք (24.3 մլն դոլար), քիմիայի և դրա հետ կապված այլ նյութեր։

Ըստ թեմայի

Ներմուծում և արտահանում. ինչ է փոխել կորոնավիրուսը
ՌԴ–ն Ադրբեջանին նախազգուշացրել է միրգ–բանջարեղենի ներմուծման հնարավոր սահմանափակման մասին
Ներմուծվող որ ապրանքները կազատվեն հարկերից. փոխնախարարը մանրամասներ հայտնեց
թեգերը:
Հայաստան, ներմուծում, Թուրքիա, Եվրասիական տնտեսական միություն (ԵԱՏՄ)

Գլխավոր թեմաներ