ԵՐԵՎԱՆ, 16 մարտի - Sputnik. 2021 թ-ի գնաճի հաշվարկում ու այն զսպելու համար ԿԲ հաստատած վերաֆինանսավորման տոկոսադրույքի՝ այսօր սահմանված 5.5 տոկոս արժեքում գազի գնի սպասվող թանկացումը հաշվարկված չէ: Այս մասին այսօր հրավիրված ասուլիսում հայտնեց ՀՀ ԿԲ նախագահ Մարտին Գալստյանը:
«Այս բազային սցենարի ներքո, ըստ էության, գազի գնի թանկացում այս տարվա համար դեռևս չի նախատեսված: Բայց այդ հարցը մեր ուշադրության կենտրոնում է»,- ասաց Գալստյանը՝ պատախանելով լրագրողի հարցին, թե որքանով է ներկա տոկոսադրույքն արտացոլում այդ բացասական սպասումը:
Նշենք, որ այսօր ԿԲ խորհրդի նիստում հաստատված վերաֆինանսավորման տոկոսադրույքը պահպանվել է նույն մակարդակի վրա, ինչ 2021թ-ի փետրվարին՝ 5,5 տոկոս:
ԿԲ նախագահը լրագրողներին հայտնել է, որ այդ կերպ հնարավոր կլինի զսպել կանխատեսվող գնաճային ճնշումները:
Մարտին Գալստյանը հայտնեց, որ 2021թ-ի փետրվարին արձանագրվել է 0.6 տոկոս գնաճ՝ 2020թ-ի փետրվարի 0.2 տոկոս գնանկման դիմաց: Արդյունքում 1 տարվա գնաճը փետրվարին հավասարվել է 5.3 տոկոսի: ԿԲ-ի կանխատեսմամբ, տարեվերջին գնաճը կկազմի նպատակային 4 տոկոս: Այս կանխատեսման մեջ, փաստորեն, գազի հնարավոր թանկացումը նախատեսված չէ:
Հիշեցնենք՝ մարտի 16-18-ը Հայաստանից պատվիրակություն է մեկնում Ռուսաստան։
Պատվիրակության կազմում են ՀՀ փոխվարչապետ Մհեր Գրիգորյանը, ՀՀ տարածքային կառավարման և ենթակառուցվածքների նախարարի տեղակալ Հակոբ Վարդանյանը, Հանրային ծառայությունները կարգավորող հանձնաժողովի նախագահ Գարեգին Բաղրամյանը և Մհեր Գրիգորյանի արարողակարգի պատասխանատու Դավիթ Գևորգյանը։
Գազալցակայանները կախված են դոլարի փոխարժեքից. ուրիշ ի՞նչ գործոններ են ազդել գազի գնի վրա
Որոշման մեջ նշված է միայն, որ փոխվարչապետը վերադառնալուց հետո եռօրյա ժամկետում պետք է գործուղման արդյունքների մասին հաշվետվություն ներկայացնի ՀՀ վարչապետին, իսկ այցի նպատակը չի բացահայտվում: Այդուհանդերձ, մամուլում արդեն լուրեր կան, որ այցը կապված է 2021թ-ի ընթացքում Հայաստանին մատակարարվող գազի գնի վերանայման հետ:
